logo

Weganan di Volleyball entre Schoolnan Basico

Riba calendario di ‘Deporte Escolar’ organisa pa IBiSA ta tumando lugar e competencia di volleyball entre e schoolnan di Enseñansa Basico pa mucha muher. Tur wega ta den Centro Deportivo Libertador Betico Croes na Sta. Cruz y ta cuminsa pa 3’or di atardi. E  schoolnan cu ta enfrentando otro ta: Pius X School, Cacique Macuarima School, Prinses Amalia School, Colegio Santa Famia y Commandeur Pieter Boer School.

 

Den e prome wega a enfrenta otro Pius X School y Cacique Macuarima School, cu a resulta den un wega fuerte cu dominio di e hobennan di Cacique Macuarima School cu ta gana tambe e prome set cu 25 punto contra 15 di Pius X School. E di dos set a termina 25 pa 10 cu victoria pa Cacique Macuarima School, cu ta gana’sina e prome wega di atardi.

 

E di dos wega tabata entre e hobennan di Prinses Amalia School y esnan di Colegio Santa Famia. Ambos school a bataya fuerte pa cada punto. Den e prome set Prinses Amalia tabatin e bentaha grandi y ta finalisa e set cu score di 25 pa 14. Nan ta gana e di dos set tambe, na momento cu tempo reglamentario di wega ta indica cu mester finalisa.

 

Wega cu a sigui a bay entre Commandeur Pieter Boer School y Cacique Macuarima School. For di cuminsamento e wega tabata cu basta accion di ambos banda, cu bunita hugadanan. E hobennan di Cacique Macuarima a sa di probecha cada hugada y nan turno di surf bala cu a duna nan e prome set gana cu score di 25 pa 12. E di dos set a desaroya basta pareu y completando e tempo di wega reglamentario, esaki ta caba cu score di 19 pa 15 na fabor di e hobennan di Cacique Macuarima. Un biaha mas e hobennan di Cacique Macuarima School ta batayando pa mantene nan titulo di campeon, cu nan a logra aña pasa.

 

E ultimo wega di atardi a bay entre Pius X School y Commandeur Pieter Boer School, cu a hunga e prome set cu hopi animo. Esaki ta finalisa cu score di 25 pa 19 na fabor di e hobennan di Commandeur Pieter Boer School. E di dos set ta resulta basta pareu. Pero na final di e wega ta Commandeur Pieter Boer School mes ta sali vencedor. E weganan ta continua den siman pa mira cua school ta resulta campeon di volleyball escolar pa Enseñansa Basico.

 

IBiSA ta invita fanaticonan di volleyball y muchanan di school pa bin apoya nan school den  competencia escolar.