logo

Un bon mundial pa atleta Philipine Van Aanholt net prome cu e Weganan Olimpico di Rio 2016

E atleta Arubano Philipine van Aanholt den e deporte di bela a caba di presta den bon forma durante di e Mundial di Laser Radial na Puerto Vallarta, Mexico. E atleta Van  Aanholt a termina na un di 24 luga overall mientras como pais Aruba a termina na di 17 luga den 75 pais participante. Mester bisa cu esaki ta e miho prestacion di e atleta Philipine van Aanholt den un competencia mundial. Cu 15 siman mas prome cu e Weganan Olimpico tuma luga, Philipine a demostra un progreso enorme.

Progreso

E evento Olimpico den Laser Radial ta esun mas fuerte den e categoria femenino, aki e miho atletanan di bela rond mundo ta competi den dje. Na 2012 Van Annholt a termina na un di 37 luga, e tempo ey Philipine tabata tin 19 anja di edad y a competi den e Weganan Olimpico di Londres, Inglatera. E tempo ey e tabata e di tres atleta den bela bou di 21 anja. Mas cu claro Philipine a sigui cu su estudio tambe y a logra obtene su  Bachelor Bedrijfskunde y despues di esaki Philpine a concentra su mes completamente riba su deporte. Na anja 2014, Philipine van Aanholt a logra medaya di Oro pa Aruba den e Weganan Centro Americano y del Caribe cu e tuma luga na Veracruz, Mexico. Anja pasa Philipine a logra haci historia pa Aruba ora e ta termina na un di 4 luga den e Weganan Pan Americano na Toronto, Canada y aki e ta clasifica pa e Weganan Olimpico di Rio 2016. Na fin di 2015, Van Aanholt a termina na un di 40 luga den e Mundial na Oman, mientras awo e ta logra un di 24 luga y number 17 como pais.

 

Mester bisa cu Philipine ta un di e miho atletanan ora trata di creatividad, sentimento y e habilidad di “lesa” awa y biento. E prome dianan na Mexico, ora biento no tabata ariba “12 nudo”, Philipine tabata magistral unda e la logra serienan caminda ela termina na 2 luga, 14 luga, y un 3 luga y tabata un di 7 luga overall den 75 participante. Door di un bon bista strategico y tactico Van Aanholt ta pertenece na e mihonan di mundo pa loke ta competencia cu tempo liviano. Despues cu e tempo a cambia y e biento a cuminsa bira mas duro, Philipine tabata falta forza. Cu e biento duro den e dianan siguiente Philipine a cay atras riba e tabla di posicion.

15 siman mas prome cu Rio 2016

Den e simannan siguiente van Aanholt ta bay entrena prome na Italië y despues na Rio, Brasil. E lo bay traha riba su resistencia y engrandece su forza pa asina e ta miho prepara pa ora e biento ta duro. Claro e lo mester sigui adapta na e awanan di Marina da Gloria na Rio, caminda cu e competencianan ta bai tuma lugar durante e Weganan Olimpico.