logo

ULTIMO PRESENTACION DI E PELICULA ‘CABEIBUSHA’ NA THE CINEMAS

CABEIBUSA – THE CURLY GEM ta un documentario tocante Sarah-Quita Offringa produci pa e cinematografo Aleman Julian Robinet. Huntu nan ta biaha rond mundo pa filma.  Nan ta sali busca e olanan mas halto na Australia y ta bishita Aruba, Hawaii y ta explora territorionan desconoci na Icelandia . Tambe a keda documenta e lucha pa titula campeon durante e competencianan na Islas Canarias y Turkia. E pelicula ta captura un mucha muher hoben caluroso y fuerte cu ta enfrenta momentonan di lucha y quietud. E pelicula ta visualmente asombroso yena cu paisahe cu ta lagabo babuca di nan bunitesa y accion di windsurf cu ta mustra e habilidad spectacular di windsurf cu Sarah-Quita ta pose’e. Di otro banda e pelicula ta pinta un potret intimo di un atleta campeon di taya mundial cu ta captura curason di otro cu su actitud senciyo . Momentonan den su bida entre competencia , trainmento, biahamento y e reto pa trata cu stress y soledad ta documenta. Den e pelicula su compañeronan ariba e Tour International di PWA esta Kiri Thode y Taty Frans tambe ta figura. E siman aki por probecha y mira e pelicula ainda y den weekend na Renaissance y Paseo Herencia  y por ultimo ariba dia di Betico dialuna 25 di januari na Renaissance pa 3:00pm