logo

Tradicional Feria Himno y Bandera 2016 den paso fino na Villa Floralina

E Organisacion Cabayista Arubano, O.C.A. tambe lo celebra nos Dia Nacional Himno y Bandera cu un tremendo competencia di cabay na Villa Floralina. E feria di cabay celebrando nos himno y nos bandera lo wordo teni riba dos dia esta diasabra 19 y diadomingo 20 di maart proximo. Riba e diasabra e competencia ta pa e cabay nan di tur modalidad, e lo inicia for di 5or di atardi y lo bay te laat den oranan di anochi. Pa su majan diadomingo e feria lo inicia pa 3or di atardi esaki pa nos amazona y jinetenan den tur edad.  Ta bon pa menciona cu for di awor caba nos por a presencia e diferente amazona y jinetenan hunto cu nan cabaynan ta entrena casi tur dia pa asina duna nan miho presentacion riba e dia di competencia na Villa Floralina 

 

E deporte di Paso Fino semper a destaca internacionalmente cu algun bon jinete y amazona, manera Mark Bruin kende a sali Aruba su atleta di anja na 2012, tambe nos tin Melanie Wever cu tambe a sa na gana e titulo di atleta di anja den su categoria, Mas cu claro no por keda sin menciona Alina Mansur y mas recien Zoey Arends y Gianluca Curiel. Tanto Bruin, Wever y Mansur a logra titulonan mundial den e deporte aki, Aruba y su deporte di Paso Fino a gana admiracion y respet den exterior. E atletanan Arends y Curiel ta hobennan cu actualmente ta destaca den bon forma den e deporte di cabay.