logo

SV R.C.A ta titula campeon pa di 34 biaha

Na tur, tabatin 36 wega den e campeonato di futbol division di honor 2015 y 2016 y tabatin 10 wega di Playoff. E ekiponan cu a yega den final tabata Deportivo Nacional/Washington cu a keda na di 4 luga, SV Britannia cu a keda na di 3 luga, SV Dakota cu a keda na di 2 luga y SV RCA cu a bira e campeon absoluto di Aruba, pa di 34 aña!

 

Stadion Guillermo P. Trinidad a habri porta for di trempan caba pa asina e wega a start exactamente 7:00pm unda e dos ekiponan mas fuerte di henter e campeonato a bataya cu otro pa e trofeo di campeon. Ya diaranson e prome wega a tuma luga unda RCA a gana, pues un empate mes lo tabata suficiente pa RCA bay cas cu e trofeo. Asina mes na di 40 minuut di wega e hungado J. Bergen (#10) a hinca e prome y unico gol, pero cu tabata suficiente pa e titulo di campeon.

 

E ambiente den stadion tabata di fiesta, di alegria y por bisa cu na final no tabatin ningun eventualidad. Publico a acepta e resultado y den esaki mester menciona cu e actitud di e hungadonan mes a haci un diferencia grandi y a yuda e publico den acepta e final. Hungadonan di ambos team contrario tabata brasa otro y felicita otro pa e resultado, demostrando asina cu e principio di “Fairplay” ta biba bou di e futbolistanan hoben aki.

 

A dedica henter e campeonato na Roland “Jachi” de Cuba pa mas di 25 aña dedica na SV Hubentud Tanki Leendert, na Marco “Njaks” Rasmijn pa su añanan como hungado y entrenado di SV Estrella y Chommy van der Linden pa su añanan dedica na San Luis Deportivo.

 

Tocante SV RCA

A funda SV Racing Club Aruba (RCA) dia 15 di februari 1934. E ekipo a sa di crece den e ultimo 82 añanan te bira un organisacion di riba 300 futbolista. Nan ta parti den division di infantil, hubenil, hoofdklas, damas, 35+, 40+ y 50+. Roland "Ditto" Acosta ta Presidente di e organisacion, mientras cu Veron Albertsz ta e Director Tecnico di e ekipo di 25 futbolista cu ta hunga den e division di Honor.

 

Historia a conta nos cu den pasado, e ekipo di RCA a logra titula campeon den diferente liga na Aruba na 34 ocasion. E ekipo di RCA ta e prome campeon di pais Aruba na aña 1986 y ta e prome team di Aruba pa bira campeon Antiano na aña 1966. E ultimo biaha cu SV RCA a bay cas cu e trofeo di campeon tabata den e campeonato di aña 2015, e tempo ey contra SV Estrella.

 

SV RCA ta conta cu sosten di su patrocinadonan Big Wheel Lottery y Powerade (Tropical Bottling Company).

 

Tocante SV Dakota

A funda SV Dakota dia 15 di Juli 1947 door di Momon de Castro. Dakota a bira campeon na aña 1961, 1962, 1963, 1965, 1966, 1969, 1970, 1971, 1974, 1976, 1979, 1980, 1981, 1982, 1983, 1988, 1991 y 1995. Na tur e ekipo ta conta cu 15 titulo di campeon, 5 titulo di sub-campeon, 5 biaha campeon invicto, 2 biaha tres titulo di campeon consecutivo y 1 biaha 4 titulo di campeon consecutivo.

 

SV Dakota ta consisti di 9 categoria den futbol, cu ta Mini Baby (25 hungado), Baby (20 hungado), Lifida A (18 hungado), Lifida B (18 hungado), Menor (18 hungado), Mayor (22 hungado), Junioren (20 hungado), Damas (25 hungado) y Hoofdklas (30 hungado). SV Dakota tin alrededor di 196 hungado activo, 9 trainer, 9 lider y un staf tecnico di Hoofdklas cu ta consisti di Franklin Priest como Hoofdtrainer, David Puriel como Assistant Trainer, Albert Lake Jr como Assistant Trainer y Conny Van Niel como Fysiotherapie. Pues hunto nan ta forma alrededor di 250 miembro activo.

 

E directiva di S.V. Dakota ta consisti di Harvey Clement como Presidente, Rossi Marchena como Tesorero, Gilmar Croes como Secretario y Jose Wernet como Administrado.

 

Tocante Arubaanse Voetbal Bond

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.