logo

Sv Britannia Damas ta titula campeon di Aruba

Dialuna ultimo tabata tin e di dos wega di play off final di AVB den categoria di Damas ora cu e Pumanan esta Sv Britannia Total Finance / Splenda a enfrenta e tricolornan di Solito. Den e prome wega Sv Britannia Bright Bakery / Splenda y RCA ta empata 2-2 y unda cu RCA tabata gana casi te na final di wega, pero un Britannia disidido ta empata e wega na final. Dialuna ultimo a tuma lugar e di dos wega cual wega mester tabata tin un ganado, pasobra cu un empate atrobe lo mester a bai over na hunga un di tres wega. Pero desde comienso di wega e Damanan Britannia Total Finance / Splenda a cuminsa domina e wega y for di trempan bo por a wak cu Sv Britannia Splenda a bin cu intencion serio pa bai cu e titulo un biaha mas cas. Di otro banda e team di RCA Damas tabata hasi nan maximo pa trata di tene nan gol limpo, pero cual tarea no tabata fasil. Den di prome mitar Sv Briannia Bright Bakery ta bai ariba 2-0 cu golnan anota pa Aaliyah Simon y Lysanne v/d Voort y asina halftime ta drenta cu score di 2-0 na faobr di Sv Britannia Total Finance. Den di dos mitar Sv Britannia Splenda un biaha mas ta sali disidido y ta hunga bon bala cu bon pasonan cu a sigi duna e defensa tricolor dolor di cabes. Den di dos mitar ta Mylenne Croes y un biaha mas Aaliyah Simon cu ta anota pa e team di Paradera y asina e wega ta bin caba cu score di 4-0 na fabor di Sv Britannia Bright Bakery / Total Finance. Un pabien grandi ta bai na e hungadornan di Sv Britannia Damas cu a prolonga nan titulo di campeon, na e coachnan y na staf technico completo. Danki na e fanatica cu a apoya Britannia Splenda durante henter e campeonato y specialmente den e weganan di playoff. Un pabien tambe na RCA Damas cu nan titulo di Sub-campeon unda cu RCA tabata un digno di un finalista y tambe na Estudiante cu nan di 3er lugar y na La Fama cu nan di 4er lugar. Un pabien tambe na A.V.B. cu por wak atras ariba un tremendo campeonato y cu tremendo marketing pa e divicion di Damas, na e refreenan cu a hasi un tremendo trabou. Diasabra Sv Britannia Damas lo tene nan parada di campeon y ta invita su fanaticada pa uni cu nos den e parada aki.