logo

Seleccion masculino di volleyball lo hunga e 2015 CAZOVA U-21 Caribbean Championship na Bridgetown, Barbados

Den e dianan 6 - 14 di december cu ta bini un delegacion masculino den e deporte di volleyball lo sali pa e isla di Barbados unda nan lo participa den e 2015 CAZOVA U-21 Caribbean Championship. E campeonato aki ta e unico competencia cu CAZOVA ta organisa den Caribe pa e hungadonan bou di 21 aña. Segun Aruba Volleyball Association e hungadonan a prepara nan mes debidamente pa cu e torneo aki y ta sinti cu nan por haci un tremendo papel den e torneo cu lo conta cu un nivel di competencia halto mirando e paisnan participante. Den e Caribbean Championship Aruba lo mester midi forza contra fuerte paisnan den nos region manera Corsou, Guadeloupe, Martinique, Bahamas, Trinidad y Tobago, US Virgin Island y Barbados. E fuerte seleccion di Barbados ta e gran faborito mirando cu nan a titula campeon den e ultimo edicion na 2013. Actualmente e deporte di volleyball ta gosando di un popularidad grandi muy en especial den beach volleyball, unda e duo Eargenell de Cuba y Mitchell Daniel ta cosecha exito den exterior. Un palabra di exito na e seleccion U-21 di volleyball.