logo

Seleccion di softbol femenino lo representa Aruba den e Junior Little League na Guaynabo, Puerto Rico.

Durante luna di vakantie di scol diferente seleccion di baseball y/of softball ta sali pa exterior unda nan lo representa Aruba den un torneo internacional cu mas pais den nos region lo ta participa. E dianan 7 pa 13 di juli proximo, un seleccion femenino di softball 12 – 14 aña di Junior Little League softball lo sali pa e ciudad di Guaynabo, Puerto Rico unda nan lo participa den e torneo Latino  Americano di Junior League.

 

Nos seleccion di softball femenino lo bataya contra algun paisnan fuerte den nos region manera Puerto Rico, Santo Domingo y Virgin Island. Pa nos deporte colectivo ta importante pa durante torneonan internacional, nan gana e experencia enfrentando e otro islanan den nos region. Esaki ta e unico manera pa nan haya sa con bon realmente nan ta den nan deporte compara cu e otro contrincantenan mas cercano.

 

E seleccion Junior femenino tin varios luna ta prepara pa e gran torneo aki. Casi tur dia nan ta entrena ta veld di Heineken na San Nicolas. E seleccion cu ta bou guia di coachnan Marina Haynes, Carmelita Haynes y Mellizienne Richardson y ta consisti di e siguiente hungadonan kendenan ta Zjaika Kock, Shatienne Kock, Soraine Leonard, Dianiera Heyliger, Ashia Kingsale, Sanella Krosendijk, Johana Arnaud, Jeanella Kock, Nagely Albertus, Nikkaela Jacobs, Aaliyah Jack, Rachella Sewdajal y Anchell Statie.