logo

Selecccion di landamento a sali pa e competencia di CARIFTA cu lo tuma luga na Fort de France, Martinique

E seleccion di landamento di Aruba un bes mas lo midi forsa contra di e miho paisnan den e region di Caribe den e 31 edicion di e Campeonato CARIFTA cu e aña aki lo tuma luga na Fort de France, Martinique. E competencia lo ta e dianan 22 te cu 26 di Maart proximo. Mas cu claro Aruba lo bay un bes mas cu un seleccion super fuerte pa asina defende e colornan di nos bandera.

Mester bisa cu den e ultimo 10 añanan ariba e nivel di Carifta Swimming Championships porcierto un di competencianan mas halto den “Age Group” den nos region, nos landadonan a sa na saca cara y logra numeroso medaya y hasta kibra varios record di Carifta cu te ainda ta existi. E campeonato regional aki lo ta un qualifying pa e Weganan Olimpico RIO 2016. Aña pasa durante di e competencia di Carifta na Barbados, nos seleccion a logra conkista un total di 35 medaya di cual 10 Oro, 13 Plata y 12 Brons. Notable ta cu den e ultimo shete añanan, Aruba a sa na caba entre e top 3 miho islanan den Caribe. E relay team mucha muher 13 – 14 aña consisti di Anahi Schreuders, Keeley Maduro, Florence Kock y Elisabeth Timmer a logra 4 medaya di oro y kibra cuater record di Carifta den e 4x50m free relay, 4x100m free relay, 4x200m free relay y 4x100m medley relay. Tambe e hoben Mikel Schreuders a gana e High Point Trophy como e miho landado.

Mester bisa cu e aña aki e seleccion di Aruba ta preparando for di september aña pasa. E aña aki e seleccion ta consisti di e siguiente landadonan cu tempo A y B. E seleccion su atletanan cu tempo A ta Elisabeth Timmer, Brandon Cheong, Keeley Maduro, Anahi Schreuders, Daniel Jacobs y Patrick Groters, tur formando parti di Aruba su seleccion Hubenil preparando pa 2017 and 2018. E atletanan Rebecca Maduro, Andrea van den Berg y Joseph Winterdal tambe cu temponan A lo forma di Aruba su seleccion Senior preparando pa 2018. E atletanan cu tempo B lo ta Amy Pichardo, Jireh Larmonie, Gabriela Gordon, Bryan Cheong, Gwennandy Kock, Dytaysha Laurence y Kenrick Pichardo. Como entrenador principal lo ta Ismael Santiesteban hunto cu coach asistente Francisco Goedgedrag. Mas cu claro nos lo spera un bes mas un tremendo resultado di nos landadonan den e 31 edicion di e Carifta Swimming Championships.