logo

SARAH-QUITA OFFRINGA Y AMADO VRIESWIJK DI BONAIRE TA DOMINA

Den fin di siman e competencia di PWA na Fuerteventura a cuminsa y ta dura te cu 31 di juli den dos disciplina esta freestyle y slalom. E promer 5 dia ta dedica na freestyle. Diabierna na Sotavento cu ta localisa na e costa parti Sureste di Fuerteventura, Islas Canarias,  unda e biento ta supla fuerte manera e nomber di e isla ta sugeri  e evento ta tuma lugar. Fuerteventura ta e lugar durante e Tour cu mas reto pa e regatistanan di freestyle. E elementonan di naturalesa biento y awa combina cu e coriente ta produci e rampa perfecto pa lansa e regatistanan den laira pa ehucuta maniobranan potente.

Den division femenino, Sarah-Quita Offringa ta drenta e evento como e favorito. E tin ya 10 titulo mundial na tur di cual 8 ta den freestyle y 2 den slalom. Di loke nos a observa durante su trainmento su nivel a crese ainda mas cu trikinan den su repertorio manera spock culo y kabikuchi.

Den division masculino, Jose “Gollito” Estredo ken por cierto durante Aruba Hi-winds a captura e segundo lugar den freestyle  ta lidera e ranking despues di a gana e evento na Austria.

E contingente di Caribe Hulandes ta potente pa menciona algun manera Amado Vrieswijk cu a sali na segundo lugar na Austria. Taty Frans cu a gana tanto den e disciplina di freestyle como slalom durante Aruba Hi-winds, Kiri Thode, Tonky Frans, Youp Schmit, Maxime van Gent y Rafael de Windt di Corsow.

E promer dia di e competencia e biento tawata nuclear ta supla mas di 40 nudo. E promer eliminacion a cai na fabor di Sarah-Quita cu a spacha 3 di su contrincante cu facilidad produciendo  maniobranan di aire potente demonstrando asina cu e ta unico den su liga. Mientras den e division masculino un cara nobo ta surgi den persona di Yentel Caers.  Diadomingo e segundo, esta dobbel,  eliminacion a mira un cambio drastico den e careda final di ganador. E Hulandes femenino Maaike Huvermann a nabega 7 manga pa finalmente enfrenta Sarah-Quita den e final .E condicion di awa y biento tawata fluctua hopi y ta impedi SQ di ehecuta su maniobranan di aire na su gusto y consequentemente ta opta pa hasi maniobranan technico cu menos bulamento cu ta dun’e mas cu suficiente punto pa gana e dobbel eliminacion. Den division masculino Amado Vrieswijk di Bonaire ta gana e final pero tin cu bati Yentel Caers dos biaha promer cu e por canta victoria. Di e manera ey ta provoca un super final cu ta cai na fabor di Amado Vrieswijk. Asina aki e regatistanan di Caribe Hulandes tin un gara fuerte ariba e evento di freestyle na Fuerteventura.