logo

Resultadonan di Team Aruba n’e Central-American and Caribbean Youth Chess Festival na Trinidad and Tobago

Recientemente Federacion di Ajedrez Aruba (FAA) a manda 3 hungador pa participa n’e Festival Centro-Americano y Del Caribe (CAC) cu a ser organisa di 14-19 di Augustus na St. Anns, Trinidad and Tobago, na cual un total di 183 hungadoar di 14 pais a participa. E paisnan presente tabata Aruba, Barbados, Bahamas, Colombia, Costa Rica, Cuba, Republica Dominicana, Jamaica, Puerto Rico, Panama, Nicaragua, Suriname, Trinidad & Tobago y Venezuela. N’e Festival CAC tin e categorianan di edad di U-8 te cu U-18, cada un cu un seccion Absoluto (Abierto) y un Femenino. Aruba a participa pa di 4 biaha n’e CAC, pero pa prome biaha den seccion di U-12 Absoluto.

 

FAA, cu ayudo financiero di Comision di Subsidio, FAA y e mayornan, a manda Kyell-Jean Antonio y Ethan Croeze (10 y 11 aña respectivamente) pa hunga den e seccion di U-12 Absoluto, mientras cu Mark Bueno (17 aña) pa prome biaha a hunga den e categoria di U-18 Abierto. Ainda por corda cu n’e CAC di 2013 (Costa Rica), den U-16 Absoluto, Mark a logra di keda empata na di 3 lugar, pero cu desempate, a termina na di 8 lugar.

Como Hefe di Delegacion a biaha CM drs. Raymundo Dijkhoff, mientras cu sr. Jean-Pierre Lesire a biaha como coach y alabes a bay pa participa n’e Seminario di Arbitro FIDE y pasa su examen. Sra. Marcia Lopez a completa e delegacion di Team Aruba.

 

Desde aña pasa, directiva di FAA a dicidi di bin cu un reorganisacion den su structura hubenil. Desde e aña aki, a cuminsa inverti primordialmente den e categorianan bou di 12 aña. Esaki pa produci structuralmente hungadornan di nivel nacional y regional, pero tambe pa por acapara e gran interes di hubentud Arubano den e deporte mental number uno di mundo y e deporte number dos mas practica na mundo, esta ajedrez (schaak). Como parti di e reorganisacion aki, tambe a introduci un “D-groep” (tin ya un C-, B- y A-groep) pa por vang op e tantisimo peticionnan pa bira miembro di muchanan cu no sa hunga ajedrez ainda. Alabes, despues cu na 2004 a cuminsa duna training special na e grupo elite U-21, awor a introduci trainingnan special pa e hungadornan elite U-12, di cual Kyell-Jean Antonio y Ethan Croeze t’e dos hungadornan top actualmente. 

 

E metanan di FAA su participacion n’e CAC 2015 tabata diverso. FAA kier a mira unda Aruba (Kyell-Jean y Ethan) ta para den region riba nivel di U-12 n’e momentonan aki, tambe duna e muchanan nan prome experiencia internacional grandi den un torneo regional, haya un FIDE ID y purba di saca rating. Kier a logra di saca 50%, esta score 4,5 punto den 9 buelta.

Den seccion U-12 Absoluto a participa 29 hungador (3 CM) di 9 pais. Kyell-Jean a logra di score 4 punto di 9 wega (2 gana, 4 empata y 3 perdi), mientras cu Ethan a logra 4,5 punto di 9 wega (3 gana, 3 empata y 3 perdi). Starting rank di Kyell-Jean tabata 17 y el a termina na di 19 lugar, mientras cu Ethan su starting rank tabata 20 y el a termina na di 16 lugar. Por mira e resultadonan final na: http://www.chess-results.com/tnr183506.aspx?lan=1&art=1&rd=9&flag=30&wi=821

E metanan primordial pa Mark tabata pa tambe score minimal 50% y trata di yega top-10 y ken sa, logra titulo di IM of FM (prome 3 lugarnan). Tambe e meta tabata pa haya punto di rating.

Den categoria di U-18 Absoluto, a pone e hungadornan femenino hunga tambe, ya cu tabatin 5 hungador femenino so pa U-18 y mester por lo menos di 10 pa por hunga 9 buelta. En total a participa 33 hungador (5 FM y 3 WFM) di 11 pais den e seccion aki. Den su prome aña den U-18, Mark a cuminsa tremendamente bon, unda den e prome mitad di e torneo el a score 4 punto di 5 wega y tabata su so na di 2 lugar. Den den di dos mitad di e CAC 2015, pa falta di preparacion un poco mas amplio di su aperturanan (preparacion di su middenspel y eindspel si tabata sublime), Mark a score 0,5 punto den e ultimo 4 bueltanan. Asina Mark tog a logra di score su 50% (4,5 punto di 9 wega) y a termina na di 16 lugar (starting rank no. 15). Importante ta cu el a logra di subi cu 59 punto di rating. Por mira e standing final na: http://www.chess-results.com/tnr183810.aspx?lan=1&art=1&rd=9&flag=30&wi=821

 

Un logro sumamente grandi ta cu sr. Jean-Pierre Lesire durante e CAC 2015 a participa na 4 seminario di FIDE Arbiter y a pasa su examen y asina, como prome Arubiano, a logra su titulo di FIDE Arbiter! Cu 3 norma (arbiter den torneo internacional), e lo haya su titulo di International Arbiter, cu awor ta e proximo meta di dje y di FAA. Durante torneonan regional asina, banda di seminarionan pa FIDE Arbiter, ta duna seminario tambe pa FIDE Trainer/Instructor (tin 5 nivel) y International Organizer. Meta di FAA ta pa cuminsa biaha cu mas miembro adulto, manera a pasa durante e biahe aki pa Trinindad and Tobago, pa asina logra e titulonan aki tambe.

 

Mester menciona cu Jamaica como pais a termina na di prome lugar, Colombia na di dos lugar, mientras cu Trinidad and Tobago a termina na di tres lugar di e CAC 2015. FAA tambe tin como meta pa un dia logra di termina riba un di e prome lugarnan di un torneo regional, pero banda di e reorganisacion di su hala hubenil, mester participa cu hopi mas hungador (no 2 pa 4 of 5 so). Jamaica p.e. a participa cu 23 hungador, Suriname cu 34, Colombia cu 10 y Trinidad cu mas di 50, pa menciona algun. Lo ta bon si por yega na participa den cada categoria di edad (Absoluto y Femenino), desde U-8 te cu U-18, cu por lo menos dos hungador (masculino y femenino), pa asina structuralmente traha na hisa e nivel di ajedrez hubenil na Aruba.

Federacion di Ajedrez Aruba ta satisfecho cu e resultadonan n’e CAC 2015 y kier a gradici Comision di Subsidio immensamente pa e ayudo financiero haya y ta spera di sigui conta cu nan sosten pa hunto sigui traha riba e desaroyo di ajedrez na Aruba, en especial di nos hubentud.