logo

PWA 2015 WORLD TOUR TA YEGA SU GRAN FINAL NA POLYNESIA FRANCES

CARIBE HULANDES CU TREMENDO RESULTADO NA NOUMEA, NEW CALEDONIA

ORANJESTAD-NOUMEA

Seis dia di biento nuclear di promedio 20-25 nudo ta loke tanto Taty Frans di Bonaire como Sarah-Quita Offringa di Aruba ta presencia na New Caledonia. Cu nan carinjo y actitud isleño nan ta hala atencion. Nan ta planta respet ora huntu nan ta duna e bishtantenen un show di freestyle di kita sombre. Caribe hulandes tin aden mas ainda ora cu ambos ta cosecha exito den transcurso di e competencia di slalom.  Posiblemente Taty y Sarah-Quita ta bin di islanan chikito pero esey no a kita afor cu nan ta hanja atencion pa nan actuacion consistente durante e evento. Taty y Sarah-Quita ta uni forsa y ta comparti e mesun container pa pone nan ekipo y pa por papia Papiamento leu f’ey cas. Na tur Taty tin 9 eliminacion y 2 careda di clasificacion pa corre promer cu drenta final cu ta suma 27 careda. Sarah-Quita tin 10 eliminacion y 1 careda di clasificacion cu ta 20 careda na tur. E reto ta un trayecto di  careda cu ta consisti di 4 te cu 6 buoy y tin bez hasta 3 eliminacion pa dia. Taty y Sarah-Quita  cu nan velocidad y ansha pa crusa e linja como promer ta den posicion delanta y ta ser desqualifica. Despues nan ta saca nan som y ta cambia nan strategia y ta corre nan careda sin pifia hasta ta gana algun. Cansancio ta cuminsa drenta den curpa di SQ como cu e ta e ultimo evento pa e anja y ya desde maart e ta competi den tur tres disciplina di windsurf esta Freestyle, Ola y Slalom. Ariba e ultimo dia di competencia cos ta pinta poco desfavorabel pa SQ por corre den e ultimo careda final di ganador di e siman como cu na comienso di e penultimo careda e ta dal den un otro windsurfer tumbando ambos pa despues sigui corre y dal abow na e tercer buoy y no ta recupera liher manera ta su custumber. SQ no ta entrega y ta dera trot accelerando ariba su fin pa pasa su contrincantenen di un manera relampago y logra clasifica den e ultimo lugar pa pasa pa e careda di ganador . Ta como si fuera cu Sarah-Quita y Taty a palabra di antemano pa e campeonato aki termina cu nan dos como sub-campeon na Noumea, New Caledonia.  E siman aki ta keda graba den memoria di Taty Frans como cu e multi-talentoso Bonairiano aki ta conkista pa promer biaha un lugar ariba podium di slalom. Sarah-Quita di otro banda ta acumula durante henter anja 6267 di un total di 6300 punto pa titula campeon mundial di Slalom femenino. Sarah-Quita Offringa ta comenta ariba su pagina di facebook cu ” e titulo aki ta algo mi a antoha  desde cu mi a logra mi bachelor’s den sciencia na april 2014“ Asina aki e ta conclui un temporada di windsurf tremendo unda e ta titula campeon di freestyle, campeon di slaom y sub-subcampeon di Ola pa promer biaha den su carera. Cu e logro aki Sarah-Quita ta logra su vision y mision cu tawata di competi den tur tres disciplina durante e tour y para ariba podium di cada disciplina.  Awor e tin 10 titulo mundial di cua 8 den freestyle y 2 den slalom na e edad di solamente 24 anja . Banda di competi na 10 evento  e ta filma huntu cu e cinematografo Aleman Julien  Robinet un documentario di su bida solitario como windsurfer cu ta busca lugarnan di windsurf rond mundo unda e tin di enfrenta condicionnan di clima di frieuw extremo  na Reykyavic, Islandia y di calor sofocante den desierto na Australia . Un pelicula cu imagenan cu ta kita bo rosea. Pronto e pelicula “Cabeibusha” – The Curly Gem ta strena pa promer bez na Aruba na cuminsamento di Januari 2016.

 

Overall Standings of the 2015 Airwaves Noumea Dream Cup - Women’s

1st Delphine Cousin  2100 pts

2nd Sarah-Quita Offringa  2067 pts

3rd Lena Erdil  2034 pts

Overall Rankings of the 2015 PWA Slalom World Tour - Women’s

1st Sarah-Quita Offringa 6267pts

2nd Delphine Cousin 6102 pts

3rd Lena Erdil 6036pts

Overall Standings of the 2015 Airwaves Noumea Dream Cup - Men’s

1st Pierre Mortefon )2100 pts

2nd Taty Frans 2067 pts

 3rd Cyril Moussilmani 2034pts