logo

Prome 12 teamnan di futbol di Aruba a ricibi nan “Club License”

Na Aruba tin un total di 32 ekipo di futbol cu via nan club ta asocia na Arubaanse Voetbal Bond (AVB) cu na su turno ta miembro activo di CONCACAF, Caribbean Football Union (CFU) y FIFA. Cu cambionan drastico den e organisacionnan internacional, ta forsando pa na nivel nacional y di e clubnan tambe haci e mesun cambionan aki, den cual ta otorga clubnan cu pasa e ehercicio aki un “Club License”. Durante un evento bon atendi, e prome 12 clubnan di Aruba a ricibi nan licencia for di man di e representante di CONCACAF y AVB.

 

FIFA a start e proceso, CONCACAF ta sigui cune pa e region aki. Jonathan Martinez, Manager Club Lisencing di CONCACAF a bin Aruba pa entrega e prome certificadonan. Mester menciona cu Randolf Lacle, miembro di directiva di AVB, for di aña 2013 ta pushando e proyecto aki. Cu masha alegria e Presidente di AVB, Richard Dijkhoff, a duna di conoce cu “E fundeshi ta cla, ban sigui construi awo”, referiendo na e trabounan cu ta sigui awor den cada club pa ta miho prepara pa e cambionan den e organisacion madre di futbol.

 

E "Club Licensing System" di FIFA ta basa riba 5 criterio principal: Deporte, Personal y Administracion, Finansas, Infrastructura y Huridico/Legal. Meta di e criterionan aki ta pa salvaguardia e credibilidad y integridad di competencianan di e clubnan mientras ta improvisa e nivel di profesionalismo den e famia di futbol y promove mas transparencia den aspectonan financiero y miho control den clubnan.

 

E prome 12 teamnan di Aruba cu a ricibi nan licencia oficial ta SV Dakota, SV Arsenal, SV Britannia, Sportclub Bubali, SV Estrella, SV Hubentud Tanki Leendert, SV Undesa, SV Riverplate, SV Racing Club Savaneta (RCS), SV Racing Club Aruba (RCA), SV Nacional/Washington y SV Sporting.

 

E prome paisnan, miembro di FIFA y CONCACAF cu a start e proceso pa haya licencia pa su clubnan y cu tabata presente na e prome seminario organisa pa FIFA tabata Anguilla, Antigua & Barbuda, Aruba, Bahamas, Barbados, Belize, Bermuda, British Virgin Islands, Canada, Cayman Islands, Costa Rica, Cuba, Corsou, Dominica, Republica Dominicana, El Salvador, Grenada, Guatemala, Guyana, Haiti, Honduras, Jamaica, Mexico, Montserrat, Nicaragua, Panama, Puerto Rico, St Kitts & Nevis, St Lucia, St Vincent & the Grenadines, Surnam, Trinidad & Tobago, Turks & Caicos Islands, US Virgin Islands y Merca mes.

 

Mester menciona cu FIFA ta hopi serio den e proceso aki pa no solamente innova y profesionalisa su organisacion, pero tambe di tur e clubnan miembro. Arubaanse Voetbal Bond (AVB) siendo miembro di Confederation of North, Central American and Caribbean Association Football (CONCACAF) ta comprometi pa cana e caminda di desaroyo y progreso aki. Di otro banda Asia Football Confederation (AFC) y Union of European Football Associations (UEFA) a lansa e sistema di "Club Licensing" caba den nan respectivo continentenan, mientras cu FIFA ta planea pa organisa mas di e seminarionan aki pa e demas confederacionnan, esta Confederation of African Football (CAF), Confederation Sudamericana de Futbol (CONMEBOL) y Oceania Football Confederation (OFC). Na tur tin 6 confederacion resortando bou di FIFA.

 

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.