logo

Primicia di e pelicula Cabeibusha pa scol basico Mon Plaisir y Prinses Amalia

Maestra di scol, Muriel Brown Roos a bin cu e master plan pa proyecta e documentario cabeibusha pa alumnonan di scol basico como instrumento educativo. Cabesante di Prinses Amalia maestra Roelien Hoffman-Kock tambe ta uni forsa huntu cu Marja Hoveling y Marisol Tromp pa logra pasa e pelicula “CABEIBUSHA” pa e alumnonan di klas 5 & 6 di ambos scol na total algo mas di 200 mucha. Conhuntamente nan ta traha pa logra hanja sponsor di instancianan y personanan priva pa e proyecto aki. E meta ta  pa fomenta e alumnonan nan auto-estima y amplia nan horizonte mediante un role model local den persona di Sarah-Quita Offringa. Despues di e cine e alumnonan por a hasi pregunta na Sarah-Quita.

Algun pregunta tawata tocante kiko a hib’e na practica e deporte di windsurf, kiko su meta ta cuanto trofeo e tin na total, si e sa ta nervioso durante competencia y con e a bin na e nomber cabeibusha y cuanto idioma e ta papia, kiko ta su hobbynan y si e a yega di lesiona su mes. Sarah-Quita su contesta tawata cu e ambiente durante Aruba Hi-Winds y e forma relaha di e regatistanan a atrae na e deporte, su meta antes tawata pa gana un of mas titulo mundial y awor su meta ta pa biaha pa conoce diferente lugar pa windsurf y conoce un variedad di culturanan, E tin promedio un total di 40 trofeo di cua 10 ta pa titulonan mundial, ora e ta nervioso esey e ta hanja ta bon pasobra e ta mas alerta y e ta ripiti su mantra cu ta “ Tur cos mi por den Cristo, kende ta dunami fortalesa”, e nomber cabeibusha su tata Ruud Offringa a dunele como email adres, E ta papia Hulandes Papiamento Ingles Frances, Spanjo y ta comprende  Portugues(brasil)  Aleman y Turco. Como hobby e gusta lesa buki, hasi man di obra, landa, tennis, surf y por ultimo e nunca a sufri lesion pisa fuera di algun rasga y corta te anja pasa ora cu su curpa a dobla bai patras y a lesiona su lomba cu ta pone cu ta poco stijf. Siguientemente  algun alumno a regala Sarah-Quita dibuho, kaarchi y poesia. Tawata bisto cu e alumnonan a disfruta di e oportunidad aki y na final a bati man pa Sarah-Quita su presencia.

Ainda tin oportunidad pa probecha y mira e pelicula “CABEIBUSHA”na the cinemas durante siman na Renaissance pa 6:00pm y na Paseo Herencia pa 5:00pm y 6:30pm y por ultimo na Renaissance diasabra y diadomingo pa 3:00pm. No cabisha probecha.