logo

Presidente di AWB, Juelle Thode lo atende congreso di UCI na Richmond, Merca

Dia 25 di september proximo lo tuma luga na Richmond, Virginia e campeonato mundial di ciclismo organisa door di e federacion mundial di ciclismo, UCI. Durante di e campeonato mundial, e federacion ta probecha di e oportunidad di organisa e congreso anual pa tur su miembronan rond mundo. Contrario na e añanan anterior, e aña aki si Aruba Wielerbond lo ta presente na e asamblea representa pa su presidente, Juelle Thode.

Un asamblea anual di un federacion mundial di deporte ta hopi importante y mester ser atendi pa nos representantenan maximo di cada federacion deportivo, esaki pa un tin continuacion positivo cu lo yuda na engrandece e desaroyo di e deporte den su totalidad. Durante e asamblea di UCI lo presenta e relatonan anual, lo eligi un directiva nobo, lo duna meritonan, mientras lo papia y discuti riba diferente topiconan cu tin di haber cu e deportenan cu ta cay bou di UCI cu ta ciclismo di ruta, mountain bike y BMX. Asina tin mucho mas informacion cu lo wordo duna rond di e desaroyo di e tres deportenan aki. E federacion di AWB mes lo purba establece contact mas estrecho cu e federacion Mericano di ciclismo pa mira si por tin un posibel trahamento hunto entre ambos pais.