logo

PREMIERE EXITOSO DI E PELICULA ‘CABEIBUSHA’

E pelicula tan spera ‘Cabeibusha’, cu sub-titulo ‘The curly gem’ a bay den premiere diahuebs ultimo. Cu un publico hopi entusiasma, mas cu 200 bishitante a congrega na The Cinemas na Paseo Herencia pa mira e documentario basa riba bida di Sarah-Quita Offringa.

Sarah-Quita ta  e regatista Arubiano di windsurf cu a titula campeon mundial pa 8 biaha den freestyle y  2 biaha den slalom acumulando di e manera aki riba su nomber 10 titulo mundial. Ademas di e logronan aki, e hoben Sarah-Quita cu apenas 24 aña tawata  sigui su estudia academico y a obtene su titulo di Bachelor  den  “Science and Innovation Management” na  Universidad di Utrecht na Hulanda.

Durante e premiere por a mira un publico di hoben y adulto cu a asisti pa presencia e debut di Sarah-Quita Offringa riba pantaya di cine.

Na comienso di e anochi tawatin un brindis compaña pa un pasaboca y sacamento di potret cu e protagonista Sarah-Quita Offringa como tambe co-actornan Elton ‘Taty; Frans y Demenson ‘Kiri’ Thode cu ya pa mas cu 10 aña ta amigonan di windsurf di Sarah-Quita. Nos por corda cu algun aña pasa a documenta den e pelicula ‘Children of the Wind’ con windsurf a impacta Taty y Kiri nan futuro. E pelicula menciona a participa den e Film Festival di Aruba na 2013. Taty y Kiri a bin Aruba for di Bonaire pa presencia e premiere na Aruba.

Despues di e presentacion di e pelicula tawata tin oportunidad pa haci pregunta na Sarah-Quita. Hopi tawata e interes pa sa con a yega na traha e pelicula aki y e fondonan pa hasi tal. Sarah-Quita  a comenta cu ta un coincidencia di circumstancia durante e PWA evento na Turkia na 2013 cu a hiba na esaki. Eynan Julian Robinet (e cineasta) y Sarah-Quita a dicidi di cuminsa cu e filmacion di e documentario na cuminsamento di 2015 cu apoyo entre otro  di Aruba Tourism Authority, Guardian Group y personanan priva cu a contribui online cu e proyecto.

Loke a cai na agrado di e publico presente tawata e posibilidad  despues di e pelicula pa cumpra e set di buki y pelicula cu ta contene potretnan y storianan skirbi pa Sarah-Quita di loke a pasa tras di scenario firma pa Sarah-Quita instantaneamente.

Mester observa cu den e pelicula loke ta resalta, ta e pasion, fervor y determinacion di Sarah-Quita pa enfrenta e retonan captura den escenanan di naturalesa extraordinario unda ta sufri hopi frieuw y calor.

E pelicula Cabeibusha lo sigi estrena na The cinemas na Renaissance y Paseo Herencia e siman aki y otro siman.

Riba e potretnan por mira mas di e acontecimento ameno cu a tuma luga.