logo

Pa Mikel Schreuders e ta un honor grandi di por representa Aruba den e Weganan Olimpico di Rio 2016

Den luna di november aña pasa durante di un competencia na Republica Dominicana, e hoben Mikel Schreuders a haci historia pa Aruba door di bira e prome landado masculino cu a marca un tempo di clasificacion pa un Weganan Olimpico. E clasificacion a bini un poco di sorpresa paso ningun hende no a spera cu Mikel lo yega e tempo di clasificacion asina lihe, aunke un siman prome durante di un competencia na Tennessee el a yega e tempo pero esaki no tabata uno oficial. Actualmente e hoben Schreuders ta bishita e Universidad di Missouri conoci tambe como Mizzou na Merca unda e ta biba, studia y practica su deporte faborito cu ta landamento. Durante di estadia cortico na Aruba a probecha di papia cu e hoben Arubiano riba su logro historico y con e lo prepara su mes pa Rio de Janeiro. 

 

Mikel ta conta cu na Santo Domingo riba e prome dia e la landa algun time trial cu no a bay na su gusto, e no a marca e tempo desea riba e 50m y 100m free. Esaki tog tabata un desapunto pe mirando cu un siman prome na Tennessee e la yega e tempo di clasificacion pero esey no tabata un competencia reconoci pa logra temponan di clasificacion. Mikel a pensa cu kizas cansancio lo por a hunga un rol den su prestacion. Pero mesora e la kita e duda aki for di su mes y pensa mesora riba su prestacion na Tennessee. Den su mes e la pensa cu e ta bay logra of e no ta bay logra, pero e lo haci su maximo esfuerzo pa marca un bon tempo aunke e sa cu tin mas competencia unda e por tog logra clasifica pa Rio. Pa su dia siguiente Mikel mester a landa e 200m free y aki ta caminda cu e la pone su meta pa logra un clasificacion Olimpico. Segun Mikel a la sinti bon den awa, na cien meter e ta tende tur hende ta grita y aki ta caminda cu e la cuminsa pusha mas duro, e mes a pensa "awo of nunca". Ora e la mishi e muraya, e la wak e tempo di 1.51.12, ya e tabata sa cu e la marca un tempo di clasificacion. Aunke e no tabata manera esun di Tennessee, pero e mas importante ta cu esaki ta esun cu ta conta. Mas cu claro Mikel tabata super felis paso e la yega e tempo di clasificacion pa Rio 2016. Tur e sacrificio y trabou duro durante tur e añanan di landamento a duna su fruto. A lo largo esaki ta loke cualkier atleta ta soña di dje, esta yega un Weganan Olimpico. 

 

Pa Mikel awo e trabou duro mes ta bay cuminsa paso a lo largo tur hende lo kier haci un prestacion sublime na Rio. E lo cuminsa na entrena 10 bes pa siman y hopi intensivo cu hopi competencia den fin di siman. Mester keda focus riba un bon preparacion, train duro y haci bo best na tur momento. Mas cu claro Mikel lo purba di clasifica den e 100m free, esaki lo bira su proximo meta. Mikel ta masha orguyoso di por a clasifica pa e Weganan Olimpico, un muestra cu apesar Aruba ta chikito pero nos tambe por logra. Pa Mikel e ta un honor grandi di por representa Aruba den un Weganan Olimpico.