logo

New Caledonia e siguiente reto pa Sarah-Quita den e gran final di PWA Slalom.

Despues di 26 ora di biahamento  Sarah-Quita ta enfrenta e siguiente y ultimo reto di windsurfing pa aña 2015. Desde Hawaii SQ ta bula pa Auckland, Nieuw Zeeland pa despues sigui su biaha pa Noumea,  New Caledonia, cu ta localisa na banda oost di Australia den lama Pacifico banda oeste cu ta parti di Polynesia Frances. New Caledonia ta ariba lista di UNESCO como Patrimonio mundial desde 2008 pa motibo cu eynan tin e lagun mas grandi di mundo cu ta midi 44.000km. E di diferencia di tempo cu Aruba ta 15 ora. E Regatistanan veloz den slalom ta baha ariba e paraiso tropical aki pa e final di e slalom tour unda e campeonnan mundial ta ser dicidi y corona. E evento ta tuma luga entre 24-29 di November.  Hunto cu Taty Frans di Bonaire cu tambe ta actua den e pelicula “Cabeibusha” –the Curly Gem- Sarah-Quita Offringa ta representa Caribe Hulandes den e disciplina di slalom. E competencia aki ta un test di forsa y nervio como cu e biento ta supla entre 10 pa 30 nudo cu ta produci hopi scuma e asina yama “white caps”. Sarah-Quita cu ta lidera e evento final di aña a gana e 2 competencianan anterior na Korea y Turkia. E ta regresa ariba full e tour di slalom pa prome biaha desde cu el a gana esaki na 2011. Firmemente posiciona e ta rumbo pa conkista su segundo titulo mundial di slalom. E prome dia di e competencia e biento tawata mucho debil y ta ser cancela. Su siguiente dia biento ta percura pa un dia cu hopi drama entre e regatistanan. Sarah-Quita ta keda trankil y ta caba tur careda den segundo lugar. Ainda falta 4 dia pa termina e evento prome cu e bolbe Aruba pa strena e pelicula “Cabeibusha”-the curly gem- na comienso di januari 2016. Keda pendiente.