logo

Lotto cu palabra di pabien na e atleta Kamilah Dammers kende a debuta como hungado profesional di bowling na Merca

Recientemente e bolichera local Kamilah Dammers a haci su debut como profesional den e liga Pro Women Bowling Association na Merca. E hungado Arubano cu a termina su estudio cu exito a opta pa drenta e circuito profesional femenino unda mas cu 80 hungado rond mundo ta formando parti di esaki. Siman pasa e hungado estelar Kamilah Dammers a haci un super bon papel den su aparicion como bolichera profesional den e Topeka Open na Merca. E atleta Kamilah Dammers a logra un di 7 luga den 80 hungado profesional na Merca den su prome aparicion y esey sigur ta un logro grandi. A hunga dos dia di torneo y un total di 30 wega cual ta un experiencia nobo mirando e cantidad grandi di wega cu e hungado Arubano no ta custuma cune. Asina mes Kamilah a logra drenta e final di diasabra unda e miho 16 di e 80 hungadonan so ta keda. A lo largo e ta termina na di 7 luga den e weganan final y esaki sigur ta un bon comienso pa e atleta Dammers. Fin di luna awo e atleta Dammers tin cu bolbe mira accion den dos diferente torneo profesional na Merca cu entre otro e US Open.