logo

Landamento sincronisa lo competi den e Confederación Centroamericana y del Caribe de Natación na Panama

Recientemente un delegacion den e deporte di landamento sincronisa di Arubaanse Zwembond a sali pa e pais di Panama unda den e dianan benidero nan lo competi den e campeonato organisa paConfederacion Centroamericana y del Caribe de Natacion, CCCAN.

E competencia lo tumaluga den e ciudad capital esta Panama City e dianan 7 pa 10 di juli y lo conta cu e miho atletanan den e region Centro Americano y Caribe. Te cu awor aki e paisnan cu lo competi den e CCCAN ta Panama, Costa Rica, Curacao, El Salvador, Venezuela Guatemala, y Aruba. Nos atletanan di landamento sincronisa ta cla pa e competencia aki, nan a prepara debidamente pa esaki y no tin duda cu nan lo duna un tremendo presentacion na Panama. E atletanan cu lo representa Aruba ta Abigail de Veer, Meghan Tromp, Kainah Croes, Anastasia van Daal, Rizhaylee Bello, Avigayle Tromp, Mikayal Morales, Angelina Hamoen y Kyra Hoevertsz. Como coach lo tin Yami Romay.

Mester bisa cu den Caribe, Aruba su atletanan di landamento sincronisa ta wordo considera como un di e mihonan den e region. Nos atletanan semper a sobresali den numeroso competencia internacional. Den pasado atletanan di synchro a triunfa logrando medaya den Weganan Centro Americano y Del Caribe, mientras cu den competencianan colegial na Merca como tambe eventonan internacional na Europa nos atletanan tabata exitoso. Esaki sigur ta danki na e propio atletanan, nan mayornan, staf di coachnan y AZB cu tur dia ta traha duro na bienenstar di e deporte di landamento sincronisa.