logo

Kiwanis Club of Palm Beach a haci donacion di watercooler na diferente scol y instancia

Pa mas cu 5 aña, Kiwanis Palm Beach Aruba ta yuda nos scolnan na Aruba cu diferente necesidad manera entre otro watercoolers. Den e añanan cu a transcuri, e e peticionnan di e scolnan como tambe instancianan educativo pa ricibi un ayudo di Kiwanis Palm Beach Aruba a bira mas grandi.

Pa Kiwanis Palm Beach Aruba ta importante cu nos muchanan ta den un ambiente escolar caminda den pauze, cada mucha por hunga, core y haci amistad cu su coleganan di klas y/of scol. Aki e mucha ta desaroya diferente habilidad cual a lo largo lo yude den su formacion como persona. Mas cu claro ta importante pa e mucha ta bon hidrata y ta bebe suficiente awa na momento cu e ta hunga pafo den solo, gymzaal, ect. Nos mester corda cu awa ta saludabel pa e mucha y preferibel awa frieu, ya cu e ta refrescante. Riba e aspectonan aki Kiwanis Club of Palm Beach ta enfoca.

'Crush the Thirst' ta un proyecto nobo cu e meta pa provee muchanan na scol y Centronan Educativo cu awa limpi y frieu pa asina sasia nan sed. E enfoke di e proyecto aki ta dirigi riba scolnan preparatorio y basico. Na e momentonan aki Kiwanis Club of Palm Beach ta yuda e scolnan den forma di un watercooler pero ya caba ta pensa riba otro ideanan pa cu e meta di e projecto aki. Tambe e club ta den combersacion y ta aserca diferente posibel partnernan pa sostene e proyecto aki.

E intencion ta pa yuda mas tanto scol y instancia posibel aunke mester ta conciente cu no por yuda tur na mesun momento. Te cu awor ya a distribui 20 watercooler na diferente scol y/of organisacion. Scol y/of instancianan cu ya caba a ricibi un watercooler e aña aki ta Juliana School, Maria Goretti School, Multi Disciplinair Centrum y Cas di Cultura.