logo

Inscripcion ta habri dialuna pa Ban Move Camp San Nicolas

Ta bon pa cada mayor planea y regla for di trempan e vakantie di su yiu. “Ban Move Camp” ta un actividad cu ta wordo organisa anualmente pa Ministerio di Deporte, IBiSA y ASU. Esaki ta e programa di vacacion cu ta wordo organisa den luna di juli y cada siman e concentracion ta na un localidad diferente, dunando asina muchanan di varios districto di Aruba pa participa activamente y pasa un dushi temporada di vakantie.

 

Inscripcion pa Camp na San Nicolas:

E oportunidad pa inscribi participacion di bo yiu na e programa di vacacion ‘Ban Move Camp- San Nicolas’ ta habri dialuna awor na IBiSA Sport Centrum San Nicolas situa na Dr. Schaepmanstraat 52. Inscripcion ta tuma lugar for di dialuna, dia 27 di juni 2016 te cu diabierna dia 8 di juli 2016, for di  8’or di mainta te cu 4’or di atardi. Esaki ta posibel tan ten cu tin cupo disponibel! IBiSA ta corda mayornan cu tin solamente 100 cupo disponibel pa e camp. Na momento cu yega e cantidad di cupo, no ta tuma mas inscripcion.

 

Riba e dia di camp no ta tuma inscripcion. P’esey ta pidi mayornan pa acudi tempran y sigura e cupo di bo yiu. E siman di ‘Ban Move Camp’ na  Sportcentrum San Nicolas (IBiSA SN ) ta  tuma luga dialuna 25 pa diabierna 29 di juli 2016.

 

Rekisito na momento di inscribi:

Un mayor of voogd di e mucha mester pasa personalmente pa inscribi y mester trece e carchi di AZV di e mucha pa por registra su number di AZV pa e wordo sigura. Na momento di inscripicon ta haci e pago tambe. E costo di participacion ta Afl. 25,- pa 1 yiu. Pa 2 yiu esaki ta bira Afl. 40,-; y pa 3 yiu e participacion ta bira Afl. 60,-. E costo di participacion ta pa mucha pa siman y e ta encera cu e mucha ta ricibi su T-shirt y pa dia 1 sandwich, 1 juice y 1 fruta.

 

Siman di “Ban Move Camp”:

E orario di e actividad ta for di 8’or di mainta pa 1’or di merdia. Y e programa ta pa muchanan di 6 pa 14 aña cu ta bayendo Scol Basico. Durante e siman, e muchanan ta haya un programa organisa y varia cu ta encera “Deporte y Movecion” tur dia. Pa mas informacion por tuma contacto cu oficina principal di IBiSA na telefoon 582 4987.