logo

Hugo Themen a wordo eligi como miembro di e Comite Tecnico Panamericana de Levantamiento de Pesas

Den e dianan 25 pa 27 di februari ultimo, e conocido entrenador y alabes dirigente y actual presidente di e federacion di pesas, Sr. Hugo Themen tabata na e ciudad di Santo Domingo, Republica Dominicana unda a tuma luga e Congreso Electoral pa e periodico 2016 pa 2020 di e Federacion Panamericana  de  Levantamiento de Pesas. E congreso a conta cu un participacion di 22 pais miembro di e confederacion Panamericano, entrenan Aruba como tambe Corsow. Mirando e importancia di e congreso tabata tin varios personanan importante den e mundo di pesas a atende esaki manera e presidente di e federacion mundial di weightlifting, Dr. Tamas Ajan y e Secretario General Mr. Ma Wenguang.

 

Durante di e congreso tabata tin e eleccion pa tres puesto den e Comite Tecnico Panamericano pa e proximo cuater anjanan y aki Sr. Hugo Themen tabata un di e ocho candidatonan cu a postula su mes pa drenta dicho comite. Cu hopi orguyo mester bisa cu Sr. Hugo Themen a keda eligi como un di e tres miembronan den e Comite Tecnico Panamericano cu 14 voto. E Dominicano William Ozuna e keda eligi como e presidente di e Federacion Panamericana  de  Levantamiento de Pesas. Lotto, e loteria di Aruba kier a felicita Sr. Hugo Themen cu su funcion nobo como miembro di e Comite Tecnico Panamericano den e Federacion Panamericana  de  Levantamiento de Pesas. Mas cu claro un pabien tambe na Aruba Amateur Weightlifting Association kende ta traha duro na bienestar di e deporte di pesas na Aruba.