logo

FIFA di bishita na Aruba pa yuda AVB adapta su statutonan

Recientemente FIFA tabatin 2 ehecutivo di bishita na Aruba pa yuda Arubaanse Voetbal Bond (AVB) adapta su statutonan. Manera ta conoci, FIFA tambe a pasa den un proceso di reformacion bastante extenso pa por adapta su statutonan pa cumpli cu e exigencianan di "Good Governance". Despues cu FIFA a adapta su statutonan e la inclui un articulo den su statuto cu ta haci cu e federacionnan tambe mester cumpli cu e exigencianan di “Good Governance" cu FIFA a implementa.

 

Asina directiva di AVB a sinta 2 dia largo pa repasa cada articulo den e statuto actual y bou di conseho di e representantenan di FIFA a haci e diferente adaptacionnan. E representantenan di FIFA cu tabata na Aruba ta Lucas Nicola, FIFA Manager Member Associations y Rolf Tanner kende ta FIFA Legal Advisor.

 

Durante e proceso pa haci e adaptacionnan a aclaria varios incertidumbre of mal interpretacionnan. Entre otro por menciona cu locual a keda aclaria por medio di e adaptacionnan ta e rol di directiva di AVB. E directiva di AVB lo haya un tarea diferente na locual e tin na e momentonan aki y lo tin di funciona como un "Raad van Toezicht" y no lo ta ocupa mas cu e "daily operations". Esey awor lo ta na encargo di e Secretario General kende lo ta responsabel pa e procesonan interno, naturalmente bou di supervision di e Presidente di e Federacion.

 

Mester menciona cu mayoria ta cambionan cu pa hopi tempo caba e Presidente actual tabata boga pa nan y di cual hasta a costa su persona un "mocion di desconfiansa” aña pasa. Por mira cu su deseonan pa modernisa e operacion di AVB y e forma con ta maneha e organisacion awor a bira hasta "mandatory" dor di FIFA. Cu e cambionan aki awor ta cla cu actualmente AVB tin un Presidente cu vision y un biaha mas ta keda demostra cu e Presidente actual a anticipa di trempan riba e cambionan cu ta bini di tanto FIFA, CONCACAF como CFU.

 

Un otro cambio cu lo introduci hunto cu e adaptacionnan di statuto lo ta e forma cu e federacionnan tin di haci control financiero. E proceso lo ta di tal indole cu lo garantisa transparencia total. Door di haci e adaptacionnan ariba menciona, AVB lo cumpli cu e exigencianan di FIFA pa por aplica pa bini na remarca pa fondonan di FIFA.

 

Manera cu a bira conoci despues di e congreso di FIFA na Mexico, FIFA a pone mas fondo disponibel pa e federacionnan y pa bin na remarca cada federacion mester cumpli cu exigencianan basta pisa cu FIFA a pone “in place”. No ta asina cu e fondonan ta poni na disposicion di e federacionnan pa por haci uzo na nan gusto. E fondonan ta parti den diferente categoria y pa cada categoria tin diferente exigencianan cu e federacionnan mester cumpli cu nan prome cu por bin na remarca pa e fondonan.

 

Un di e exigencianan ta pa dentro di un periodo di tempo tur federacion mester adapta nan statutonan pa asina por maneha, dirigi y administra futbol di un forma hopi mas profesional. Cu esaki FIFA ta obliga tur federacion pa bay over pa un federacion mas profesional. E ta implica diferente cambio na diferente nivel den e organisacion, cual cambionan lo bira mas bisto na momento cu e statuto nobo keda aproba.

 

Asina aki FIFA kier pa e federacionnan funciona miho y pa cumpli cu e codigo di "Good Governance". E cambionan aki ta haci cu dentro di poco AVB lo tin di amplia su personal cu mas profesional riba diferente ramo.

 

A funda Arubaanse Voetbal Bond na aña 1932 y a afilia na CONCACAF na aña 1986 y despues na FIFA na aña 1988. E ta e organisacion cu ta maneha futbol amateur y profesional riba nos isla, incluyendo e muchanan, hoben, hende muhe y adultonan. E ta responsabel pa sanciona e refereenan y e torneonan di futbol organisa pa mayoria liga. Nan oficina ta situa den Compleho Deportivo Frans Figaroa na Noord.