logo

Federacionnan deportivo unanimamente a aproba e Relato di aña 2015

Dos biaha pa aña e federacionnan deportivo miembro di Comite Olimpico Arubano ta reuni den loke ta e Asamblea General.Dialuna ultimo den un bon atmosfera, COA a tene su Asamblea General den e ballroom di Holiday Inn Hotel pa trata e relatonan di aña 2015. Den marco di e asamblea directiva di e asociacion a ricibi aprobacion di parti di su miembronan pa e rumbo cu ta hibando e organisacion y deporte na Aruba.Prome cu e reunion a inicia, cada representante di e federacion deportivo presente a ricibi algun pins di Rio 2016,esaki como recuerdo y tambe un pechi y pen cortesia di Aruba Bank kende ta e partner nobo di COA. Esnan presente a probecha di e oportunidad di saca potret cu e replica di e antorcha Olimpico di Rio de Janeiro, mientras cu por a cumpra tambe e serie special di stampia cu Post Aruba N.V. a traha na ocasion di e Weganan di Rio 2016 y di cua nos atletanan Olimpico lo beneficia.Mester bisa cu un total di 18 di e 24 federacion deportivo afilia na COA a haci acto di presencia na dicho asamblea.

Secretario General di COA, Sra. Nicole Hoevertsz a repasa e relato di e gran cantidad di actividadnan cu a tuma luga den e aña 2015. Mester bisa cu COA a organisa varios actividad riba tereno di desaroyo pa nos coach y dirigentenan, sin lubida algun actividad pa nos propio atleta y hende muhenan. Tambe a participa na congresonan y reunionnan internacional, mientras a traha riba proyecto y actividadnan local, Olympic Solidarity y Weganan Deportivo.Mas cu claro a repasa e tremendo prestacion di e delegacion cu a competi den e Weganan Panamericano na Toronto, Canada, na juli 2015 y caminda cu Aruba a participa cu un cantidad record di 25 atleta, cual ta un otro logro historico. Es mas e resultadonan obteni ta papia pa su mes, e miho te cu awor aki den Weganan Panamericano.Na final e resumen di e actividadnan di aña 2015 a wordo aproba unanimamente pa e sala cu un aplauso fuerte. 

Representante di e compania Ernst and Young, sr. Giacomo Petrocchihunto cu tesorero di COA, sr. Jairzinho Tromp a repasa e cuenta anual di aña 2015 cual na final e sala a aproba unanimamente tambe.

Deporte na Aruba ta riba e bon caminda, mientras cu e desaroyo ta uno sumamente positivo, sigur si nos mira con shete atleta a logra nan clasificacion pa e Weganan Olimpico. Esaki ta un logro historico pa e deporte Arubano. Comite Olimpico Arubano y tur su 24 federacionnan miembro tin e intencion di sigui traha duro y cu dedicacion, pa asina deporte logra mehora mucho mas ainda.