logo

Federacion di esgrima lo organisa un dia di competencia celebrando nos dia nacional Himno y Bandera

E aña aki e celebracion deportivo riba nos Dia Nacional Himno y Bandera lo ta grandi. Alrededor di diez federacion deportivo sin conta e club y/of instancianan di deporte cu lo organisa nan torneo riba e dia aki. E aña aki, un bes mas e federacion di esgrima esta Scherm Amateur Bond Aruba (S.A.B.A.) lo tene un dia di competencia pa tur su miembronan activo.  E evento lo ta diadomingo 20 di maart cuminsando pa 10or di mainta den e gymzaal di Colegio Cristo Rey na San Nicolas. Ya for di 9or di mainta lo tin e oportunidad pa inscribi y registra pa e competencia. E atletanan di arte martial lo ta cla pa midi forza contra otro riba e dia aki. Den e ultimo añanan e interes pa practica e deporte di esgrima a crece na Aruba, principalmente nos hobennan a cuminsa mustra interes den e deporte di espada. Esgrima ta un deporte Olimpico y nos tin sigur cu e atletanan lo tin e deseo di yega un dia e evento grandi asina. Actualmente nos atletanan di esgrima a cuminsa competi riba plataforma internacional den nos region cual ta un muestra di disciplina, dedicacion y boluntad pa logra yega na e soño Olimpico ta existi.