logo

Ekipo di Hulanda ta habri porta pa mas hungado di Aruba

SPARTA Rotterdam ta brinda bonbini na tres hungado di Aruba Soccer Academy pa un tryout

ORNAJESTAD , Aruba 4 augustus 2016 : Diamars atardi Aruba Soccer Academy a invita prensa pa un encuentro na e oficinanan di nan sponsor principal Mediq pa un anuncio alentador.  David Abdul, Eric Abdul y Alwin Toppenberg a bisa cu den apenas su prome seis lunanan di existencia ASA a surpasa su meta anual di manda un hungado Hulanda pa tryout, y tin tres hoben biahando den e proximo dianan pa Sparta Rotterdam riba un invitacion for di e organisacion pa bay tryout cu nan division “jeugd”.

E tres hungadonan ta Edhyon Hersilia di SV Britania; Mishawn Molina di RCA y Wesley Illes di SV Estrella. David Abdul a bisa cu den Edhyon a mira masha hopi talento, Mishawn ta un hoben cu a desaroya sumamente lihe y Wesley ta un hoben cu sa di uza su estatura y fisico en general na su beneficio riba cancha.

Ademas di talento y determinacion, e hobennan aki tin un disciplina admirabel, y famianan cu ta para 100% nan tras den nan desaroyo y realisacion di nan soño di bira hungadonan profesional. E sosten di famia ta sumamente importante, como cu si nan logra un tryout exitoso e famianan lo mester muda pa Hulanda pa e hobennan por sigui desaroya nan mes den e team di Sparta Rotterdam, y mas leu.

David Abdul a splica cu ta un proceso di algun luna pa scoge hungadonan pa bay tryout. Aruba Soccer Academy tin 100-y-pico hungado, cual tur ta ricibi training intensivo y ta wordo observa y guia di cerca pa cu e desaroyo. El a bisa cu prome e trainernan hunto a scoge ocho pa 10 hoben cu nan lo concidera cla pa un tryout,  of cu por wordo prepara pa un tryout. Nan ta bay algun wega y ta determina tambe si mentalmente nan ta cla pa un paso asina grandi.

Futbol ta un sport unda cu ta considera e persona completo, no solamente su habilidadnan tecnico/ fisico, pero tambe su forsa mental/sicologico.

Danki na e bon contactonan cu e rumannan Abdul a keda cun’e for di tempo cu nan mes tabata envolvi cu Sparta Rotterdam, for di 10 aña pasa, nan a logra pa haya e tres cuponan pa tryout pa e hungadonan aki.

E hobennan lo biaha cu un mayor, y lo presencia un wega di Sparta contra Ajax riba diadomingo. Esaki tabata un sopresa cu a logra haya como un gesto di bonbini pa nan. E ta un momento hopi importante tambe den e historia di Sparta, unda cu despues di seis aña e ekipo a logra subi bek pa eredivisie di Hulanda.

Contrario na e ekipo di Sparta mas halto, e ekipo di hobennan no a baha di categoria den su division y semper a keda den top di nan wega. David Abdul ta splica cu e ekipo Sparta Jeugd ta conoci pa ta un ekipo fuerte unda cu Ajax, Feijenoord y PSV ta cumpra hungado.

Martin Koopman, kende ta un ex-hungado profesional conoci pa Roda y FC Den Bosch ta e persona di contacto na Hulanda pa ASA y e mayornan di e hobennan durante di nan bishita. E ta representa ASA pa cu asuntonan cu mester regla pa e hobennan na Sparta. Tambe nan ta conta cu e apoyo y sosten di Denzel Dumfries, kende ta hunga den e division profesional di Sparta.

Desafortunadamente pa motibonan fuera di nan alcance no tin trainer di ASA ta biahando hunto cu e hobennan, pero ASA a percura pa e miho “opvang” posibel y pa tur cos ta cla pa nan ora nan yega Hulanda.

David Abdul ta agrega cu ASA ta hopi contento cu e confiansa cu Sparta tin den ASA, cu a resulta den e invitacion aki, despues cu ASA a manda nan tur informacion di e hobennan.

Alwin Toppenberg a dirigi su mes na e hobennan durante di e conferencia di prensa, motivando y encurashandonan pa goza di e oportunidad y experiencia cu nan a logra haya.

El a bisa nan cu un tryout semper ta hopi emocionante, y ta algo completamente nobo; cu nan lo sinti poco stress, pero mester keda semper positivo. Talent ta importante, pero den tur deporte suerte tambe ta hunga un rol, el a bisa, domina e stress y nervio, keda semper positivo.

Un tryout ta un “leermoment” y fayo ta parti di cada momento di siñamento, pero keda motiva bo mes pa sigui dilanti, purba atrobe, Toppenberg a subraya. El a comenta cu nan pa nan corda cu e tryout ta algo unico, nan tin talento, y mester sigui padilanti y purba atrobe. Toppenberg a pidi e mayornan tambe pa coopera y papia y motiva nan yiunan. Futbol ta diberticion, el a agrega, drumi na ora, come bon, y scucha canticanan cu ta relax e hobennan anochi.

Eric Abdul a subraya e importancia di ta fuerte mentalmente y tin disciplina. El a agrega cu tin dos sceneario, cu sea nan no ta logra e tryout y ta bolbe Aruba y sigui train, of nan ta logra y lo mester muda pa Hulanda pa sigui cu Sparta.

E mayornan tambe a wordo avisa caba di e decisionnan cu nan tin nan dilanti y tur tres hungado tin mayornan, y den caso di Edhyon tambe su omo y tanta, cu ta para 100% nan tras y ta cla pa haci loke mester haci pa nan por logra sigui desaroya den nan deporte preferi. E ekipo di Sparta lo asisti e famia den haya scol pa nan yiu,