logo

Ekipo di Aruba den landamento sincronisa a logra un di seis luga den rutina tecnico

Diahuebs atardi, e ekipo di landamento sincronisa di Aruba a mira accion pa prome biaha den e Weganan Panamericano Toronto 2015, esaki den e Centro Acuatico CIBC.

 

E ekipo di Aruba a start como e number shete pa loke ta e rutina tecnico, esaki den un elenco consisti di ocho pais fuerte manera Argentina, Merca, Canada, Brazil, Peru, Mexico y Cuba. Notabel ta cu e presentacion di e ekipo di Aruba a cay na agrado di un y tur presente den e centro acuatico, e aplauso di esnan presente tabata bon mereci. Apoya pa e resto di e delegacion mas algun mayor y familiar kendenan tambe a haci e biahe pa Toronto pa asina apoya nan yiu, e ekipo di Aruba guia pa Alva Torres a haci nan miho presentacion den e rutina tecnico. Na final e huesnan a duna e ekipo di Aruba un puntuacion di 68.4442, e scorenan tabata pa ehecucion 21.0000, pa impresion 20.4000 y pa elemento 27.0442.

 

E competencia den su totalidad tabata un satisfactorio pa e team di landamento sincronisa di Aruba. E di seis luga conkista ta un muestra cu tin futuro den e deporte aki mirando cu a competi contra e mihonan di e continente America. Overall na di prome luga a keda e ekipo di Canada sigui pa Mexico y USA. Diasabra awo e ekipo di Aruba den landamento sincronisa lo mira accion atrobe pa di dos biaha den e Weganan Panamericano Toronto 2015 ora nan landa e rutina liber. E puntuacion di rutina tecnico y esun di e rutina liber lo ser conta hunto pa asina saca e puntuacion final cu lo defini tambe e posicion final di e ekipo di Aruba. Un pabien sigur ta bay na e ekipo di landamento sincronisa pa e di seis luga conkista den e rutina tecnico.