logo

E seleccion di landamento sincronisa U12 & under a conkista varios medaya den e campeonato di CCCAN na Barbados

Recientemente e seleccion di landamento sincronisa bou di 12 anja tabata na e isla di Barbados unda e campeonato di Central American and Caribbean Amateur Swimming Confederation, CCCAN a tuma luga. Mester bisa cu na e campeonato aki varios pais a participa manera Corsou, Jamaica, Republica Dominicana, Aruba y Barbados. Mester bisa cu pa e mayoria atletanan cu a forma parti di e seleccion di landamento sincronisa Aruba tabata nan prome competencia den exterior, pues un experencia completamente nobo a spera e seleccion bou di 12 aña. Na Barbados a competi den e rutinanan di duet, figures, solo y team. Pa loke ta e resultado final nos tin cu bisa cu nos damitanan di Aruba a sa cay den premiacion den tur e rutinanan. E hobencita Janelly Piña tabata grandi pa Aruba den e competencia di CCCAN na Barbados unda e la conkista no menos cu 4 medaya di cual dos di oro y dos di plata.

E competencia di Duet, Aruba ta keda na di dos luga y bon pa un medaya di plata esaki pa Sarah Silva y Janelly Piña, mientras e duo di Caroline Kelly y Angelina Hamoen a keda na di cinco luga den e competencia overall. Den e competencia di Figura(Figures), Janelly Piña ta bolbe conkista un medaya di plata bon pa un dii dos luga mientras cu Sarah Silva ta keda na e cinco luga y net su tras ta termina Ryxiane Malmberg na di seis luga. Den e competencia di Solo, e prome luga y e medaya di oro a bay pa Janelly Piña, mientras cu e hobencita Sarah Silva a keda na di cinco luga. Por ultimo den e competencia di Team, e seleccion di Aruba a logra gana e medaya di oro ora nan ta keda na di prome luga dilanti di Republica Dominicana cu e keda cu e medaya di plata. Si mira e prestacion den su totalidad nos por bisa cu sin duda algun e campeonato di CCCAN bou di 12 aña tabata uno exitoso pa e seleccion di landamento sincronisa di Aruba. E deporte acuatico tin un futuro briyante su dilanti. Un palabra di pabien na e atletanan Sarah Silva, Janelly Piña, Caroline Kelly, Angelina Hamoen, Mikayla Morales, Avigayle Tromp y Ryxianne Malmberg como tambe na coach Yami Romay.