logo

E ora di berdad a yega pa atletanan di landamento sincronisa Kyra Hoevertsz y Anouk Eman

Un soño di cualkier atleta ta pa un dia competi den e evento deportivo mas grandi di mundo cu ta e Weganan Olimpico. Un soño cu bo no lo yega un dia pa otro mirando e enorme sacrificio cu esaki ta trece cune den tur sentido di palabra. Ta añanan di entrenamento e ta exigi pa no pa papia mes di e oranan cu uno lo dedica pa logra esaki. Actualmente Aruba su duet den landamento sincronisa, forma pa Kyra Hoevertsz y Anouk Eman, tambe ta para na e momento mas importante den nan bida deportivo. Ambos atleta di Aruba ta na Rio de Janeiro, Brazil unda nan ta buscando e clasificacion Olimpico den nan deporte. Pa mas di dos aña Kyra y Anouk ta landa hunto y e ultimo seis lunanan a hasta biba hunto na San Antonio, Texas, Merca unda ambos a entrena tur dia den forma intensivo bou guia di nan entrenador mericano Lori Eaton. Recientemente e duet Arubano a haci un tremendo papel den German Open na Europa logrando puntuacionnan halto. 
 

Diaranzon mainta e duet di Aruba mester a competi contra un elenco mundial di 27 pais pa asina sigura nan clasificacion. Guia pa nan entrenadornan Alva Torres y Yamisleidis Romay, e duet di Aruba a landa prome e rutina tecnico y a haci un bon papel unda logra un puntuacion final di 73.2024 dividi den ehecucion 21.6000, impresion 22.1000 y elementonan rekeri 29.5024. Cu e resultado di e prome dia Kyra y Anouk a termina na di 19 luga den 27 competido pa loke ta e competencia di rutina tecnico. E duet di Spanja Ona Carbonell y Gemma Mengual ta lidera e tabla di posicion. Diahuebs mainta e duo di Aruba lo mira accion un bes mas, e biaha aki den e rutina liber. Mester bisa cu den pasado Kyra y Anouk a gana varios medaya pa Aruba den corto tempo cu nan tin ta landa hunto esaki den competencianan na nivel regional, continental y mundial. E mas recien ta e medaya di brons logra durante di e Weganan Centro Americano y del Caribe 2014 celebra na Veracruz, Mexico.