logo

E calender di aña 2017 tabata e topico central na reunion di Brazil Taekwondo Stichting.

Diahuebs ultimo Brazil Taekwondo Stichting a reuni hunto cu su miembronan y e calender di aña 2017 tabata e topico central. Varios punto a bin na mesa relaciona cu e ultimo dia cu por bende esaki y ki dia nan lo ta ariba mercado pa asina e team di Train Hard Fight Smart por cuminsa bende y recauda fondo pa Korea.

 

Sra. Danica Delamore a habri e reunion y a introduci e directiva na tur esnan cu a bin na e reunion pa prome biaha. Awor cu e foto shooting pa e calender ta tras di lomba, ta keda solamente pa saca potret na e sponsernan cu kier ta den e calender di aña 2017. Ya caba tin un sponser cu a mustra su interes pa forma parti di e calender di Brazil Taekwondo Stichting pa asina yuda e team di Train Hard Fight Smart yega nan meta pa Korea na aña 2017. Na aña 2015 na Korea a logra un total di 8 medaya di cual 3 medaya tabata oro. Awor kier bay cu un team, kisas mas grandi. Esaki ta keda habri pa tur esnan cu kier bay Korea y nan mester bende 300 calender pa por yega nan meta.

 

A pone hopi enfacis tambe ariba e benta di car wash pa e biahe pa Corsou, dianan 4-6 di November 2016. Tur esnan cu kier bay Corsou lo mester bende 70 carchi di car wash pa asina nan yega nan meta. Josefa Willems a elabora ariba e suma di plaka cu tin ariba e cuenta di banco y tambe ariba e entrada di e bentanan di car wash y BBQ. Mirando cu hopi no ta ni cerca ainda di e total cu mester wordo bendi pa bay corsou, a dicidi di organisa un car wash dia 31 di Juli. Awor ta wardando e Mericano Russell Beneby yega pa asina cuminsa cu e training, pa despues sigui cu ex campeon Mundial Henk Meijer for di Hulanda. Brazil Taekwondo Stichting ta inverti hopi den su atletanan di Train Hard Fight Smart.