logo

Despues di e bunita Ceremonia di Bandera, Aruba oficialmente formando parti di e Weganan Olimpico di RIO 2016

Diaranzon mainta tempran, e delegacion Arubano participando na e Weganan Olimpico di Rio 2016 a keda oficialmente yama bon bini den e Villa Olimpico cu e tradicional ceremonia di bandera. E ciudad anfitrion Rio de Janeiro y su hendenan a yama bon bini na henter nos delegacion di atleta, coach y dirigentenan. Presente na e bunita mainta aki nos por a mira Secretaria General di COA y alabes IOC Member, Sra. Nicole Hoevertsz, y tambe fanaticonan Marjolein van Aanholt y Frank Jacobs. Mester bisa cu riba ritmo y baile di e tradicion Brasilero a yama bon bini na e diferente delegacionnan presente na e Ceremonia di Bandera den e Villa Olimpico. Pa acomoda e 206 paisnan participante, e organisadornan ta agrupa e paisnan den gruponan di seis pais pa e ceremonia di bandera. E paisnan cu a participa na e ceremonia den e orario hunto cu Aruba tabata Austria, Dominica, Zimbabwe,  y China como e delegacion mas grandi. E bandera di cada pais a ser hisa den e Villa, acompanja pa su himno nacional. E show riba su mes tabata uno bunita, cu un baile spectacular pa despues move riba diferente ritmo tradicional Brasilero manera e forró, samba y bossa nova. E musica cu a ser toca ta di e legendario artistanan Brasilero Raul Seixas y Tim Maia awe den felis memoria. E Gobernador di e Villa Olimpico, ex-atleta di basketball y dos bes medayista Olimpico, Janeth Arcain a dirigi su mes na esnan presente unda su persona a pone enfasis riba e parti di humanidad durante di e weganan. "Deporte Olimpico ta nifica un miho mundo di paz y union entre hende”, e la bisa. "E ta un enorme placer pa mira tur e 206 banderanan di mundo bula hunto den e Villa Olimpico na Rio de Janeiro”. A toca e honor na nos Hefe di Mision di Aruba, Sr. Patrick Werleman pa entrega un obsekio di Aruba como recuerdo na e Gobernadora di e Villa Olimpico, Janeth Arcain. E Weganan Olimpico di Rio 2016 lo inicia oficialmente diabierna dia 5 di augustus cu e Ceremonia di Apertura.