logo

Deportivo Pereira di Colombia lo enfrenta Britannia y Dakota na Aruba

For di 3 pa 7 di augustus lo ta na Aruba e team di futbol di Colombia esta Deportivo Pereira, kendenan lo midi forsa contra di Sv Britannia reforsa y contra di Sv Dakota tambe reforsa. Actualmente Deportivo Pereira ta na prome lugar ariba tabla di posicion y ta na punto di promove bek pa e divicion mas halto di Colombia. Tambe Deportivo Pereira ta sumamente exitoso den nan divicionan hubenil unda cu nan ta produciendo masha hopi hungador di caliber halto. E prome wega lo tuma lugar dia 4 augustus proximo ora cu Sv Britannia enfrenta Deportivo Pereira y unda Sv Britannia lo reforsa cu hungadornan di Estrella, La Fama, Nac/Wash, RCA, Brazil Jrs y un hungador for di Venezuela. Sv Britannia ta tuma e wega internacional aki masha na serio y ta train masha duro mes pa enfrenta Deportivo Pereira. E di dos wega lo tuma lugar diasabra 6 augustus tambe den stadion Guillermo P. Trinidad ora cu nan enfrenta e sub-campeonnan di Aruba esta Dakota tur dia cu tambe lo reforsa cu algun hungador. E team di Deportivo Pereira ta consisti di hungadornan di U-20 y reforsa cu hungadornan di nan maximo divicion. E 3 goliadornan di Deportivo Pereira tambe lo ta presente akinan na Aruba pa duna e pueblo di Aruba y e colonia Colombiano un espetaculo di futbol. E goliadornan ta; Alvaro Melendez, Kevin Ortiz y Nicolas Ramirez. E weganan lo tuma lugar den C.D. Guillermo P. Trinidad na Dakota y lo cuminsa pa 8'or di anochi. Ticketnan di entrada lo ta disponibel na Healthy Living Club na Piedra Plat, Centro di Bario Dakota y na Power FM na Piedra Plat. Entrada lo ta solamente 10 florin pa entrada y 6 florin pa mucha. Prome cu e weganan lo tin animacion musical Colombiana den tribuna sin dak y portanan lo ta habri for di trempan. Bar y cushina tambe lo ta bon prepara. Pueblo di Aruba y especialmente e colonia Colombiano y Latino ta keda cordialmente invita pa bin presencia e weganan aki 4 & 6 augustus. Di e forma aki Mack's Exchange / Western Union ta trata di extende e lasonan deportivo y cultural entre Aruba y Colombia. Portanan di Stadion Guillermo P. Trinidad lo ta habri for di trempan pa atende cu e masa di fanatico lo bin presencia e dos weganan importante aki.