logo

Deporte Escolar organisa pa IBiSA ta cera Aña Escolar 2015-2016

Cu final di otro Aña Escolar, IBiSA su departamento di Deporte Escolar tambe ta clausura e calendario di competencia di deporte na school. Cu esaki ta conclui un temporada exitoso di deporte competitivo entre schoolnan na Aruba, tanto di Enseñansa Basico como di Enseñansa Avansa.

 

IBiSA ta gradici tur school cu a participa cu nan alumnonan, compaña y guia pa nan docente. Como tambe tur mayor cu ta apoya nan yiunan durante nan weganan. IBiSA no por keda sin gradici e team di ‘School Sport’ cu ta prepara for di prome cu inicio di e respectivo aña escolar, planeando y trahando riba e calendario di deporte. Un danki special tambe na referee, umpire y personal di e facilidadnan deportivo cu ta wordo uza durante e weganan, pa nan participacion y tremendo cooperacion.

 

Despues di e temporada di vakantie, IBiSA lo ta cla na momento cu e aña escolar nobo cuminsa den luna di augustus 2016 pa inicia cu su calendario di Deporte Escolar den luna di september.

 

Pa medio di esaki, IBiSA ta desea nos hobennan y tur docente un dushi temporada di vakantie. Descansa e curpa y mente pa despues por start e proximo aña escolar yen di animo y activamente pa participa grandemente na tur competencia di Deporte Escolar organisa pa IBiSA.