logo

Delegacion di mountain Bike lo competi den e Elite Caribbean Championship MTB na San Juan, Puerto Rico

Recientemente e federacion di ciclismo Arubano, AWB a haya un invitacion for di e federacion di ciclismo di Puerto Rico pa asisti na un evento di mountain bike regional, e asina yama Elite Caribbean Championship Mountain Bike, cu lo tuma luga na San Juan, Puerto Rico. Dia 25 di September proximo e evento aki lo inicia mientras cu Aruba lo participa cu dos atleta masculino y un atleta femenino.

E atletanan masculino lo ta Jose Maduro kende lo competi den e categoria Elite Men, mientras cu e hoben Tim Hekman lo representa Aruba den e categoria di Junior Men. Pa loke ta e atleta femenino esaki lo ta Sandra Postma kende lo competi pa Aruba den e categoria di Elite Woman. Como coach lo biaha cu e delegacion e conocido Aldrich Maduro. Mester bisa cu e atletanan di mountain bike ta den pleno preparacion pa cu e evento aki y nos tin sigur cu nan lo representa Aruba dignamente na Puerto Rico. Lotto, E Loteria di Aruba ta apoya e federacion di ciclismo kende ta trahando duro pa asina nos atletanan di mountain bike competi den e diferente campeonatonan den nos region. Esaki sigur lo sirbi como un experiencia mas pa e atletanan di mountain bike.