logo

Delegacion di bowling lo competi den e bowling hubenil Centro Americano na Bogota, Colombia

 E aña aki lo tuma luga Bogota, Colombia e Concecabol Youth Centro Americano den e deporte di bowling esaki di november 28 pa 5 di december. Aruba tambe lo forma parti di e torneo aki y lo participa cu un total di 10 atleta hubenil. Nos representantenan lo bataya den e categoria di Sub 16 y Sub 21. Den e categoria Sub 16 den femenino nos ta haya e atletanan Shaydee Kock y Bianca Suarez, mientras den e categoria masculino Sub 16 nos tin Renald Thiel y Jair Kelly. Pa loke ta e Sub 21 den e categoria femenino nos tin Jeadine Luidens y Shakiana Querero, mientras den e categoria masculino lo tin Anthony Tjin Kon Fat, Yannick Roos, Elias Halabi y Osmar Bislik. Como coach lo biaha Rita Lopez Henriquez y Criss Dammers. 

 

Aruba semper a duna bon bataya den bowling hubenil internacional logrando varios premio maximo. Un di e obhetivonan di e federacion di bowling Arubano, ARBAS ta pa promove su hungadonan hubenil door di competi cu nan den torneonan di nivel manera e Youth CAC na Bogota. Den e ultimo dos pa tres añanan e deporte di bowling tabata un di esnan mas exitoso pa Aruba den exterior esaki danki na e tremendo prestacion di nos atletanan hoben den e diferente torneonan grandi den nos region pero mas aun na e resultadonan di e dos atletanan femenino Kamilah Dammers y Thashaina Seraus kendenan a logra haci historia den competencianan renombra como tambe colegial na Merca. Claro no por keda sin menciona e tremendo labor di e federacion di ARBAS hunto cu e staf di coachnan kendenan ta traha duro na e desaroyo y progreso di nan atletanan.