logo

Delegacion di BMX lo atende un campo di entrenamento y competencia na Oldsmar y Tampa, Florida

Actualmente tin un algun atleta den e deporte di ciclismo, seccion BMX ta den pleno preparacion pa loke ta dos competencia fin di luna di october na Florida. E prome evento lo ta na Oldsmar unda lo tin e inauguracion di e pista Supercross/Olympic Track. Eynan lo tin e competencia di Gator Nationals Supercross Series, un evento di  Merca pero cu varios coredo internacional participando entre otro nos atletanan di Aruba. E atletanan cu lo realisa e biaha aki ta Zaithyel y Zyqion Soekandar, Jaymer Carolina y Shamil Figaroa, mientras como coach lo biaha Pedro Estaba.

Mester bisa cu e atletanan di Aruba lo atende un campo di entrenamento na e ciudad di Tampa esaki di 15 pa 22 di october y lo ta den combinacion cu e careda. E campo di entrenamento ta specialmente enfoca riba e careda di Gator Nationals Supercross Series. Durante di e campo di entrenamento nos coredonan lo entrena riba e aspecto tecnico y tactico como tambe strategia cu lo por wordo uza pa e caredanan. Mas cu claro e meta di e campo di entrenamento ta pa nos atletanan di bike cross ta miho posibel prepara pa e Gator Nationals Supercross Series cu lo conta cu participacion di e top coredonan di BMX. E careda aki conoci como e Supercross Series na Merca ta hala masha hopi participante full rond di e pais como tambe di exterior unda ta spera un total di 1000 participante.