logo

Delegacion Deportivo di Aruba ta sali pa Weganan Interinsular

Diahuebs atardi ta sali rumbo pa Corsou 2 delegacion deportivo, campeonnan di Deporte Escolar di Aruba hunto cu representantenan di IBiSA pa participa na e ‘Weganan Interinsular 2016’ cu ta tuma lugar e fin di siman aki na nos hermana isla. E deportenan cu ta mira accion den e prome fin di siman di competencia di ‘Weganan Interinsular’ e aña aki ta Basketball pa mucha homber di Enseñansa Basico y Volleyball pa mucha muher di Enseñansa Avansa.

 

E delegacion di Aruba ta forma pa e school campeon di Basketball Escolar 2016 cu ta Scol Basico Washington y e school campeon di Volleyball 2016 cu ta Colegio San Nicolas.

 

Deporte di Basketball:

E prome delegacion ta sali cu e vuelo di Insel Air pa 2:45 p.m. y esaki ta e hobennan di Scol Basico Washington cu ta bay representa Aruba den e deporte di basketball. E ekipo ta forma pa: Mario Amariles, Cristian Aragon Vasquez, Jefferson Baliton, Juan Gonzales Mera, Jaydan Heyden, Favio Hong Valerio, Aaron Polak, Jan Polak y Jaydan Saladin. E hobennan ta biaha hunto cu coachnan Franciscus Van Heuven y Mario Wester.

Scol Basico Washington ta mira accion di wega ya caba awe diahuebs atardi pa 5:30 p.m. ora cu nan ta enfrenta e school campeon di Corsou, esta St. Rosa de Lima.

 

Deporte di Volleyball:

Mas laat atardi, pa 5:15 p.m. ta sali den otro vuelo di Insel Air e hobennan di Colegio San Nicolas cu ta forma parti di e delegacion cu ta bay representa Aruba den e deporte di volleyball. E ekipo e aña aki ta forma pa: Leisha Curiel, Julianne Dorothal, Ghizlainy Dabian, Tsui Jade Law, Itzaїne de Cuba, Charelle Tromp, Huijuan Weng, Nakisha Winklaar, Darling Wolff y nan coach, docente Johnny Winterdaal. Mester menciona cu Colegio San Nicolas ta e school campeon di volleyball di Enseñansa Avansa di Aruba pa mas di 4 aña consecutivo. Como tal a representa nos isla na e ‘Weganan Interinsular’ pa e ultimo añanan tambe. Nan a titula campeon den e deporte di Volleyball Interinsular na aña 2013 y 2014. Solamente aña pasa den un tremendo wega, e titulo di campeon a slip for di nan man y esaki a bay pa Boneiro. Colegio San Nicolas a prepara fuerte pa trece e titulo un biaha mas pa Aruba.

E prome wega di volleyball ta tuma lugar awe pa 6:30 p.m. y esaki ta entre Scholen Gemeenschap di Bonaire y International School di Curacao. Aruba su ekipo cu e hobennan di Colegio San Nicolas ta mira accion diabierna anochi pa 7:00 p.m. 

Hunto cu e schoolnan ta biaha sr. Edgar Erasmus di IBiSA como hefe di delegacion y coordinadornan di deporte sr. Esmond Jones y Kenneth Carty.

 

IBiSA ta desea nos representantenan un bon biahe y hopi exito durante e ‘Weganan Interinsular’ na Corsou. Pa informacion, potret, etc. por sigui nos riba Facebook di IBiSA of riba website www.ibisaruba.org