logo

Competencia internacional di bike cross cu participacion di Venezuela, Corsou y Aruba

Tur aña Aruba ta sede di diferente torneonan deportivo internacional unda paisnan den nos region ta bin y competi hunto cu esunnan di Aruba mes. Mirando cu e vacacion escolar di luna di october ta den porta mayoria di nos atletanan ta mas activo cu nunca cla pa atende compromisonan na Aruba of den exterior. Den e weekend binidero, e federacion di ciclismo, seccion BMX lo tin un careda internacional grandi celebra e dianan 1 y 2 di october riba e Pista di Bike Cross na Jaburibari.

E evento a haya e nomber di BMX Challenge y lo conta cu un participacion masal di coredonan procedente di e paisnan bisiña Corsou y Venezuela sin lubida nos propio coredonan di Aruba mes. Despues di basta tempo lo organisa atrobe un careda riba e pista di bike cross na Jaburibari. Durante añanan nos atletanan di BMX a competi den varios eventonan grandi den exterior logrando resultadonan positivo pa e deporte y pa Aruba. E biaha aki nos tin e oportunidad di mira cada uno den accion e dos dianan aki contra top coredonan di tanto Venezuela como Corsou. Lotto, e loteria di Aruba hunto cu Comision di Subsidio semper ta aporta na nos federacionnan cu ta trahando duro na progreso di nos atletanan local. Ta importante pa duna e contribucion y sosten necesario na eventonan deportivo local y internacional teni na Aruba mes.