logo

Competencia di judo organisa pa Aruba Judo Bond

Despues cu den luna di maart a organisa e prome Subway Challenge den e deporte di judo cual tabata un exito rotundo, e federacion di judo a dicidi di ripiti e competencia aki September ultimo. Mirando e interes, aceptacion y acogida grandi cu esaki tabata tini no por a keda sin organisa e di tres edicion di e Subway Judo Challenge  prome cu e aña termina. 

Diasabra ultimo, e cancha di Aruba Juniors na Playa a host e Subway Judo Challenge 3, y a conta e biaha aki cu participacion internacional. For di nos hermana isla di Boneiro un grupo di atleta a bin competi contra di nos judokanan local. Esunnan presente por a admira mas di 75 combate e dia aki den e  categorianan infantil 1 – 2 – 3, cadet, junior y senior. Na Aruba tin 5 club di judo, esakinan den e districto di Tanki Leendert, Noord, Santa Cruz, Savaneta y San Nicolas, di cual Ryo San Nicolas y Judo Center Tanki Leendert ta esunnan hopi activo. Mester bisa cu e aña aki e deporte di judo a conoce varios actividad pa loke ta competencianan local pero tambe representacion den exterior. A organisa varios competencia na Aruba mes mientras nos atletanan hoben a bishita competencianan renombra den exterior y a atende camponan di entrenamento den nos region.