logo

Competencia di Interpaso 2015 celebrando su di 30 aniversario priminti di bira unico den su estilo

Fin di luna di augustus Aruba lo celebra un otro evento deportivo internacional, cu lo conta cu participacion di varios participante di exterior, esaki na Villa Floralina. E Interpaso 2015 organisa pa e Organisacion Caballista Arubano, OCA, lo ta uno masha grandi mirando cu e aña aki lo celebra e di 30 aniversario di e competencia di cabay mas grandi riba nos isla. E diferente jinete y amazonanan di Aruba ta cla pa e competi contra di esunnan di Corsou, Merca, Republica Dominicano, Puerto Rico, Colombia y Venezuela. Entre e participantenan tin algun di nivel mundial cu ta bale la pena pa admira.

 

E deporte di Paso Fino semper a destaca internacionalmente cu algun bon jinete y amazona, manera Mark Bruin, Alina Mansur y Melanie Wever. E tres hobennan aki a logra titulonan mundial den nan deporte y a sa na laga nomber di nos dushi isla di Aruba resona den exterior. E biaha aki nan lo ta competi na cas unda e presion lo ta mas grandi ainda. E competencia di Interpaso 2015 ta inicia diabierna 28 di augustus pa 6or di atardi unda cu lo tin e competencia di yeguas. Pa su mañan diasabra e lo start pa 5or di atardi unda cu lo tin e competencia di machos y tambe principiante Jinete y Amazona. E Interpaso 2015 lo clausura diadomingo cuminsando pa 10or di mainta cu mercado di Santa Rosa y lo tin competencia di carne y cabrito, pa despues sigui cu e ultimo competencia di Jinete y Amazona.