logo

COA ta felicita tur hende muher riba nan Dia

Diamars 8 di maart a celebra e Dia Internacional di Hende muher. Rond mundo, den diferente organizacion y na tur nivel di sociedad, a recorda e lucha cu hende muher mester a hiba pa logra un posicion di igualdad cu hende homber. Tambe den deporte hende muher tin un tarea importante y ta ocupa cada biaha mas funcion di relevancia. Esaki ta danki na e avanze social di e ser femenino, e hecho cu mas y mas ta reconoce e interes di hende muher pa deporte, nan capacidad y talento pa sobresali den cualquier ramo di trabou cu nan escohe.  Hende muher awendia ta participa na un nivel casi igual cu hende homber na deporte como atleta. Caminda cu tin un trabou importante pa hasi ainda ta den e areanan di tecniconan, entrenadornan, oficialnan y – muy en particular – na nivel di dirigencia den deporte. Aunque cu Comite Olimpico Internacional na aña 1996 a aproba un resolucion cu ta obliga tur Comite Olimpico Nacional, pero tambe tur Federacion Internacional, Federacion deportivo nacional y en general tur entidad di deporte, pa inclui den nan organonan di decision un minimo di 20% hende muher, nos mester constata cu mucho hopi organisacion deportivo ainda no ta cumpliendo cu e resolucion aki. Tin trabou pa hasi ainda!
Na Aruba, Comite Olimpico Arubano tin 6 hende muher den su directiva cu ta consisti di 9 miembro en total. Secretaria General di COA, Sra. Nicole Hoevertsz ta ocupa varios funcion den organizacionnan internacional, entre nan Miembro di Comite Olimpico Internacional. Pa loke ta nos deportistanan, por constata cu satisfaccion cu nos atletanan femenino ta demostrando un nivel sobresaliente. Durante Weganan Deportivo nos representantenan femenino a logra gana medaya pa Aruba ultimo den Weganan CAC na Veracruz, Mexico, manera Kamilah Dammers di bowling, Kyra Hoevertsz y Anouk Eman di landamento sincronisa y Philipine van Aanholt di Sailing. Actualmente tin tres atleta femenino cu a marca historia door di clasifica pa prome biaha pa un Weganan Olimpico. Tanto Philipine van Aanholt di sailing, Nicole van der Velden di sailing y Allyson Ponson di landamento a logra nan clasificacion pa RIO 2016. 

 

Y aunque cu e no a forma parti nunca ainda di un seleccion Olimpico, berdad ta cu e atleta Arubano cu más resultado a logra den tur deporte, representando nos pais pa añas na e nivel di mas halto, e hoben dama Sarah Quita tin multiple titulo di campeon mundial riba su nomber.

 

Comite Olimpico Arubano kier reconoce y berdaderamente celebra e exito di e ser femenino den deporte. Speranza ta cu e muhernan aki por ta ehempel pa proximo generacionnan di atleta, entrenador y dirigentenan den deporte, pa asina nan tambe por experencia pa nan mes con deporte por cambia y influencia nan bida di un forma cu ningun otro actividad por. Den nomber di Comite Olimpico Arubano y su directiva, un palabra di pabien na tur hende muher cu ta activo den deporte riba e dia tan special aki, e Dia Internacional di Hende Muher.