logo

Ceremonia di Despedida pa e delegacion Arubano cu dialuna lo sali pa e Weganan Olimpico di Rio de Janeiro, Brazil

Diahuebs anochi den e mahestuoso ballroom di Holliday Inn Hotel, Comite Olimpico Arubano (COA) a tene un anochi ameno y masha special, unda a celebra e ceremonia di despedida di e delegacion Arubano, cu dialuna awor lo sali pa e Weganan Olimpico di Rio de Janeiro 2016. Presente na e ocasion special aki, nos por a mira cuater di e shete atletanan y e coachnan, miembronan di directiva di COA, mayornan, federacionnan, invitadonan special, patrocinadornan y miembronan di Prensa.

E anochi a inicia unda a toca e tono glorioso “Aruba Dushi Tera”, sigui pa e Himno Olimpico. Den su calidad como Secretaria General di COA, Sra. Nicole Hoevertsz, a splica na esnan presente e historia di e Weganan Olimpico, e eleccion di Rio como e prome ciudad suramericano cu lo ta sede di e Weganan Olimpico y te na unda cu e ta awor. Minister di Salubridad, Deportey Cuido di nos Grandinan, Dr. Alex Schwengle y Presidente di COA sr. Edwin Roos tambe a dirigi nan mes na esnan presente, elogiando e trabou magnifico cu nos atletanan ta bin ta haci durante di e ultimo añanan.

E anochi a sigui cu diferente presentacion unda a pasa imagennan di nos atletanan den accion, y un video di e ciudad cu lo host e Weganan Olimpico 2016 esta Rio de Janeiro, conoci pa su samba y carnaval sin lubida e estatua di Cristo Redentor, e playa di Copacabana, e Pão de Açucar y e mahestuoso stadion di Maracanã. Tambe a mustra tur nos 21 atletanan elite cu desde dos aña pasa a inicia cu e proceso di clasificacion pa e Weganan Olimpico di Rio, di cua finalmente un cantidad historico di shete atleta finalmente a logra yega na e meta final, esta e clasificacion pa e Weganan di Rio.

E companía Totto cu a confecciona e uniform deportivo di e delegación pa e Weganan Olimpico di Rio 2016 tabata bon representa durante e anochi. Mester bisa cu Totto a bisti e delegacion na e Weganan Olimpico di 2016 un biaha mas. Tur presente a keda sumamente impresiona cu e bunitesa di e uniform cu ta uno di calidad superior y hopi moderno.

Tambe a introduci e diseñadora di e uniform oficial di e delegación den persona di Sra. Magali Maduro, kende for di aña 2004 ta e diseñadora oficial di COA, hunto cu e cosedor di e uniform, Señores Manish y Archie Mirchandani di H.K. Tailor.

E empresanan Manrique Capriles y Galatus Global Group N.V. a obsequia e delegacion nan productonan, cu ta proteha contra mosquita. Tambe e delegacion a ricibi un producto di chips completamente natural.

Post Aruba N.V. tabata presente na e anochi cu e serie di stampia y envelop specialmente traha na ocasion di e Weganan Olimpico.

Un delegacion di Aruba Bank N.V., partner di COA, a duna acto di presencia, expresando asina nan sosten na e delegacion Olimpico.  

A sigui cu e presentación oficial di e delegacion pa e Weganan Olimpico di Rio 2016 cu a ser transmiti en bibo pa e canal di television Tele Aruba. Momento culminante di e anochi sin duda tabata ora cu a keda introduci oficialmente na tur presente e atletanan pa e Weganan Olimpico di Rio 2016, cada un bisti den e uniform deportivo y e uniform oficial cu lo wordo presenta durante e Ceremonia Inaugural dia 5 di augustus. Nan tur a ser ricibi cu un caluroso aplauso di e publico presente. A otorga un bunita pintura di airbrush riba canvas na cada un di e atletanan, esaki realisa pa e artista Timothy Charles.

Pa finalisa e ceremonia di despedida, a hasi entrega di e bandera di Aruba na Presidente di COA, Edwin Roos kende na su turno a entrega e bandera na Ministro di Deporte, Dr. Alex Schwengle, cu a entregu’e na e atletanan Nicole van der Velden, Allyson Ponson, Mikel Schreuders y Monica Pimentel cu lo cuida esaki debidamente durante e periodo di participación na e Weganan Olimpico 2016. Por ultimo, Nicole van der Velden a wordo nombra como abanderado, siendo e e persona cu lo carga e bandera di nos país durante e ceremonia di apertura di e Weganan Olimpico 2016 na Rio de Janeiro, Brasil.

COA ta desea cada un di e integrantenan di e delegacion pa e Weganan Olimpico Rio 2016 tur clase di exito y lo sigui nan pasonan di cerca, manteniendo pueblo di Aruba na haltura na tur momento.