logo

Carondina, Kiara y Janelle ta contento di por a haya e oportunidad di representa Aruba un bes mas den landamento sincronisa

E ekipo di landamento sincronisa di Aruba no mester mucho introduccion. Pa añanan largo e deporte aki ta un di esnan miho na Aruba y probablemente cu mas exito a cosecha pa e deporte Arubano den exterior. Numeroso competencia a wordo gana den Caribe unda Aruba simplemente ta e miho, pa no papia mes di competencianan grandi rond mundo unda cu e resalta den forma impresionante. Es mas, atletanan di Aruba cu a haya e oportunidad di combina estudio y e deporte di landamento sincronisa na Merca no solamente a triunfa cu nan scol, pero tambe den duet y individualmente logrando medayanan importante como tambe campeonatonan colegial. 
Despues cu na e Weganan CAC, e seleccion di landamento sincronisa a clasifica oficialmente pa e Weganan Panamericano di Toronto unda a logra un di cuater luga, a dicidi di habri e solicitud pa amplia e seleccion cu mas landado.  Aki atletanan cu pa hopi aña a forma parti di e seleccion a opta pa haci un regreso y asina purba di gana un puesto den e seleccion. Den e luna di december, e landadonan Carondina Leijdekkers, Kiara van Trikt y Janelle Flemming a dicidi pa bin haci un tryout, probechando asina di e vacacion escolar di Merca y Hulanda pa e dianan di fiesta. Mirando cu e deporte di landamento ta biba den e tres atletanan aki, a lo largo cada un di nan a traha duro y finalmente a logra di wordo escogi pa forma parti di e seleccion nobo di landamento sincronisa y haya e oportunidad di un bes mas representa Aruba den e Weganan Panamericano di Toronto 2015.
Pa e atletanan Carondina Leijdekkers, Kiara van Trikt y Janelle Flemming e no tabata un decision facil pa incorpora den e seleccion nacional di landamento sincronisa despues di algun aña atrobe, mirando cu cada un ta hopi ocupa cu nan estudio y tin algun tempo cu nan no tabata activo manera antes si tabata e caso. 
Tur tres atleta ta masha experencia mirando cu Janelle y Kiara tin alrededor di 13 aña ta practica den synchro, mientras Carondina tin no menos cu 20 aña di experiencia den e deporte acuatico aki. Na prome instante pa tur tres atleta e no tabata nada facil, mester a traha duro riba e parti di disciplina unda bo no ta traha cu un coach. E parti fisica mester a wordo drecha unda a traha prome riba e condicion cu mester a bira optimal y tambe sin lubida e alimentacion cu ta wordo exigi pa un atleta elite. Algo hopi dificil tambe tabata entrena bo so y no den e grupo, mirando cu bo ta den exterior. Mayoria bes a uza material visual pa wak con cada rutina ta y asina purba di haci mescos. Mas cu claro mester a dedica hopi tempo den esaki door di entrena varios ora pa siman na pool y riba dje combina esaki cu e estudio universitario cu ya caba ta andando. 
Tur tres atleta ta masha contento di por representa Aruba den e Weganan Panamericano na Toronto, Canada. Cu nan cada un a wordo scogi tabata un sentimento di orguyo paso con cu bay bini, nan a sacrifica y traha bon duro pa yega aki. A lo largo sigur esaki tabata bale la pena y nan tin sigur cu nan lo haci nan maximo esfuerso pa pone Aruba su nomber briya na Canada.