logo

CARIFTA 2016 NA MARTINIQUE A YEGA SU FINAL

Recientemente e seleccion di Aruba a biaha pa Forte de France, Martinique unda nan a bay competi den e 31 edicion di e Caribbean Swimming Championships (CARIFTA). E Campeonato mas grandi den Caribe pa locual ta trata landamento.

Mester bisa cu un bes mas e seleccion di Aruba a haci un tremendo papel unda nan a logra conkista varios medaya i a keda den punto total na di 9 lugar.

E hobencita Elisabeth Timmer den categoria 13-14 femenino a logra gana 1 medaya di Oro (200 Liber), 1 medaya di Plata (100 Liber) y 2 di Bronze (100 Vlinder y 200 Wissel). Notabel  ta cu banda di esey e la logra yega na tur finals den su 7 eventonan individual, mehorando mayoria di su temponan y a sa di pone un Record Arubano nobo pa su categoria den 50m lomba. Den categoria 15-17 masculino Patrick Groters a logra gana 1 medaya di Oro (400m Wissel), 1 medaya di Plata den 200m lomba (cu un tempo Record Arubano nobo pa su categoria) y 1 medaya di Bronze den 100m lomba.

E estafette di muchamuher categoria 15-17 feminino, consistiendo di Keeley Maduro, Anahi Schreuders, Andrea van den Berg y Rebecca Maduro, a gana medaya di Oro (4 x 200 Liber).

Brandon Cheong den categoría 13-14 masculino a logra gana 1 medaya di Plata (50m Pecho). Rebecca Maduro den categoría 15-17 feminino a logra gana 1 medaya di Plata (200m Vlinder). Daniel Jacobs den categoria 15-17 masculino a gana 1 medaya di Brons (400m Liber). Den e mesun categoria Joseph Winterdal a sali na di tres lugar, cu 1 medaya di Brons den 50m vlinder.

Den 50m pecho Anahi Schreuders a sali na di 4 lugar cu un tempo di 34.06 locual ta un Record Arubano den su categoria 15-17 feminino y den Open tambe.

Aunke e atletanan Gabriella Gordon, Jireh Larmonie, Amy Pichardo, Bryang Cheong, Dythaysha Laurens, Kenrick Pichardo y Gwennandy Kock no a logra gana un medaya, tur a logra mehora diferente di nan temponan na Carifta.

AZB ta felicita tur atleta, como tambe Coach Ismael Santiesteban y Coach Francisco Goedgedrag, cu e tremendo resultado pa Carifta 2016. Un danki special ta bai pa nos  technical official, cu a traha tur dia na Martinique incansabelmente. Nos ta desea e delegashon cu ta biaha pa Bahamas fin di Juni hopi éxito pa e sigiente Campeonato cu ta CISC 2016.