logo

Campeonato di softbol Little League femenino a inicia

E campeonato di softbol Little League den e categoria femenino organisa pa Little League Softbol Aruba a inicia algun dia atras. A probecha di a tene su ceremonia di apertura hunto cu esnan di baseball Little League. Mester bisa cu e damitanan a participa den e acto di desfile pa asina Aruba completo cera conoci cu nos hungadonan di softbol femenino.

E aña aki e liga lo tin tres ekipo den e categoria di Junior/Senior y dos ekipo di Majors di 9 pa 12 aña. Tur e weganan di softbol femenino lo wordo hunga riba e parke di softbol na Pos Chikito. Lo tin dos dia segun schedule, esakinan riba diaranson cuminsando pa 6 or di atardi y diasabra ya for di 9 or di mainta. E ekiponan participante na e campeonato e aña aki ta den Junior/Senior, e ekiponan di Aruba Bank Dolphins, Panthers y Sharks mientras e dos ekiponan di Majors ta Pink Sox Sluggers y Smashers.

E deporte di softbol femenino ta uno bastante activo no solamente local pero tambe internacional. Aña pasa Aruba a forma parti di dos torneo internacional tanto na Chincha, Peru como na Guaynabo, Puerto Rico. Den ambos torneo nos damitanan a duna bon presentacion, un muestra cu nos ta riba e bon caminda pa loke ta e softbol femenino. Es mas ken no ta corda e tempo glorioso den e Weganan di Reino teni tanto na Aruba, Corsow como Hulanda unda nos seleccion femenino semper a sa na defende e bandera di Aruba cu tur honor. Ainda ta fresco den nos memoria e titulo di campeon logra na nos hermana isla di Corsow na aña 2007.