logo

Atletanan masculino di tennis lo competi den e Junior Davis Cup 2016 na Republica Dominicana

Dentro di algun dia lo tuma luga na e pais di Republica Dominicana e Junior Davis Cup 2016. Aruba Lawn Tennis Bond tambe lo manda representacion pa Aruba cu un seleccion masculino consisti di e tenistanan prospecto Kevin Yarzagaray y e dos rumannan Patrick y Frederick Sydow. Hunto cu nan lo biaha coach Claudio Martinez. E torneo lo dura di 23 pa 30 di januari y lo conta cu un participacion di varios pais den nos region y lo ta di un nivel super halto. Mester bisa cu Aruba lo enfrenta e fuerte paisnan den nos region manera Nicaragua, Republica Dominicana, Honduras, Costa Rica, Bahamas, El Salvador y Corsou. 

Ainda nos por corda con na aña 2015 durante di e Junior Davis Cup na El Salvador, e seleccion masculino di Aruba a logra haci historia door di gana e ronda pre-clsificacion y avansa pa e ronda final cu a tuma luga na Boca Raton, Florida. Pues e ekipo di Aruba consisti di Kevin, Patrick y Frederick hunto cu coach Martinez lo ta defende nan corona di campeon na Republica Dominicana. Na airport e hobennan Frederick Sydow y Kevin Yarzagaray hunto cu coach Martinez a biaha pa Republica Dominicana mientras Patrick Sydow lo uni cu e ekipo diasabra awo.