logo

Atletanan di tennis a biaha pa XXV Copa Merengue teni na Republica Dominicana

E dianan 8 pa 16 di juli proximo lo tuma luga na Republica Dominicana e di 25 edicion di e Copa Merengue den e deporte di tennis. Mirando e participacion tur aña di nos tenistanan Arubano, e aña aki esaki no lo ta un excepcion. Aruba Lawn Tennis Bond lo manda e biaha aki un seleccion di mucha homber den e edad di 16 aña.

E delegacion di Aruba lo consisti den e hungadornan Patrick Sydow, Kevin Yarzagaray, Frederick Sydow y Alexson Hessels. Despues cu siman pasa nos tenistanan a hunga e torneo internacional TIHTA na Aruba unda nan a duna bon bataya na esnan di exterior den un nivel di torneo halto, awor otro compromiso ta warda nan na Republica Dominicana unda lo enfrenta e miho hungadonan den e region di Caribe. Tur e cuater tenistanan aki tin experiencia internacional mirando cu varios biaha nan a competi pa Aruba internacionalmente y logrando premio.