logo

Atletanan di taekwondo lo atende campo de entrenamento Colombia

Durante dos siman largo un delegacion den e deporte di taekwondo lo permanece na e ciudad di Sogamoso, Colombia unda nan lo atende un campo di entrenamento. E federacion di taekwondo, ARTBO a busca e posibilidad pa nan seleccionadonan den e categorianan di Cadet(12 - 14 anja), Junior(15 - 17 anja) y Senior(18+) atende e campo di entrenamento aki como parti di nan preparacion pa cu torneonan den futuro.

E atletanan lo haya entrenamento di e experto internacional Cito Forero y lo entrena hunto cu atletanan di otro paisnan manera Peru, Costa Rica y Colombia mes. E cuater atletanan cu lo atende e campo di entrenamento ta Jayven Jansen, Charrick Winterdaal, Nasip Bislip y Angelo Rodriguez. Hunto cu e atletanan lo biaha coach Teofilo Rodriguez. 

E deporte di taekwondo a conoce un progreso enorme den e ultimo anjanan y mas hoben a cuminsa praktica e deporte di combate. Nos representacion internacional ta den bon caminda unda nos atletanan ta sobresali den e paisnan grandi. Ehempel palpabel ta e clasificacion Olimpico di Monica Pimentel sin lubida e prestacion di John Jairo Maduro na Toronto y mas recien Chiara Pertocchi na Mexico.