logo

Atletanan di judo division cadet a atende un campo di entrenamento na Republica Dominicana

Brandon Wong a logra medaya di brons

Aruba, 3 di juli. Recientemente un delegacion di judo di cadet consisti di e atletanan Theron Farro, Yuri Coffie, Jean-Luc Harms y Brandon Wong hunto cu coach Fiderd Vis a sali pa Republica Dominicana unda nan a atende un campo di entrenamento esaki como preparacion pa e competencia di US Open cu lo tuma luga den e di tres siman di juli. Na banda di e campo di entrenamento, e cuater atletanan di judo a haya e oportunidad unico di competi den un campeonato unda tabata tin varios bon judoka di Republica Dominicana participando. Pa cuater dia largo e atletanan di Aruba a entrena den forma intensivo, aki pa ora nan largo a traha duro pa mehora e tecnica y tactica di combate. Bou guia di algun experto internacional y ayuda pa nos propio coach Fiderd Vis, e atletanan a siña masha hopi mes cual lo yuda cada un di hisa su nivel di combate. Pa loke ta e competencia cu nos atletanan di cadet a participa na dje mester bisa cu e hoben atleta Brandon Wong a logra un di tres luga, bon pa un medaya di brons. Awo e cuater atletanan di judo ta bon prepara pa loke ta e Open di Merca cu lo tuma luga dentro di dos siman y mei na Fort Lauderdale caminda e miho judokanan di henter Merca lo competi.